महाधिवेशनस्थलको फोहोर उठाउँदै मत माग्दै राजेन्द्र बजगाईं

काठमाडौं । नेपाली कांग्रेसको १४ औं महाधिवेशनमा उम्मेदवार बनेकाहरुले मत माग्न विभिन्न शैली अपनाएका छन् । उम्मेदवारहरूको पर्चा, पम्पलेट र प्रचार सामाग्रीका कारण महाधिवेशनस्थल फोहोर बन्दै गइरहेको छ । खुलातर्फ केन्द्रीय सदस्यको उम्मेदवार रहेका युवा नेता राजेन्द्र बजगाईले भने अरु उम्मेदवारले गरेको फोहोर सफा गर्दै निर्वाचन प्रचार गरेका छन् ।

महाधिवेशनस्थलमा बजगाईंका समर्थकहरूले छरिएका फोहोरहरू संकलन गरेर व्यवस्थित गरेका छन् । महाधिवेशनका नाममा सहरलाई फोहोर गर्न नहुने भन्दै उनीहरूले रचनात्मक ढंगले बजगाईंको प्रचार गरेका हुन् । सरसफाइ कार्यका लागि उनले १०० जना स्वंसेवक परिचालन गरेका छन् ।

युवा नेता बजगाईंले पर्यावरणप्रति कांग्रेस नेताहरु जिम्मेवार हुनुपर्ने बताए । ‘हाम्रो महाधिवेशनका कारण शहर फोहोर हुनुहुँदैन । महाधिवेशनमा प्रतिस्पर्धा गरौ तर फोहोर नगरौं । यहीकारण म र मेरा साथीहरु सरसफाइ गर्दै प्रचारमा जुटेका हौं’, बजगाईंले भने ।

महाधिवेशन प्रतिनिधिहरुलाई भड्किलो प्रचारका भरमा नभएर पार्टीलाई योगदान गर्नसक्ने क्षमताका आधारमा मत व्यक्त गर्नसमेत उनले आग्रह गरे ।