टर्कीमाथि वेल्सको शानदार जित

काठमाडौं । आरोन रामसे र कोनर रोबर्ट्सको एक/एक गोलप्रेरित वेल्सले युरो २०२० को समूह ‘ए’ अन्तर्गत बुधबार भएको खेलमा टर्कीलाई २-० को नतिजामा पराजित गरेको छ ।

अजरबैजानको बाकुमा भएको प्रतिस्पर्धात्मक खेलको पहिलो हाफ सकिन दुई मिनेट बाँकी रहँदा रामसेले गरेको गोलमार्फत् वेल्सले अग्रता लिएको थियो ।

सुरुआतदेखि नै प्रतिस्पर्धात्मक बनेको खेलको छैठौं मिनेटमा रामसेले गरेको प्रहारमा टर्कीका गोलकिपर युगुरकान साकिरले असफल बनाएका थिए ।

यस्तै १७औं मिनेटमा वेल्सका कप्तान ग्यारेथ बेलले हेडरमार्फत गरेको प्रहार फ्रेममा परेको थिएन । टर्कीका फरवार्ड बुरक यिलिमाजले ३७औं मिनेटमा गरेको प्रहार क्रसबार माथिबाट बाहिरिएको थियो ।

प्रतिस्पर्धात्मक खेलको इन्जुरी समयमा रोबर्ट्सले ६ यार्ड बक्स भित्रबाट गोल गर्दै टर्कीको जित सुनिश्चित गरे । खेलको ६१ औं मिनेटमा पेनाल्टीमार्फत गोल गर्ने अवसर गुमाएका कप्तान बेलले नै दुवै गोलका लागि मौका सिर्जना गरेका थिए ।