४० वर्षपछि टर्कीविरुद्ध जितको खोजीमा वेल्स

काठमाडौं । युरो २०२० को समूह ‘ए’अन्तर्गत बुधबार राति ठूला प्रतियोगितामा पहिलो पटक वेल्स र टर्की आमनेसामने हुँदैछन् । अजरबैजानको बाकुमा नेपाली समयअनुसार राति ९:४५ बजे सुरु हुने खेलमा २०१६ को सेमिफाइनलिस्ट वेल्स पहिलो जितको खोजीमा हुनेछ ।

शुक्रबार राति रोममा भएको युरो २०२० को पहिलो खेलमा इटालीसँग ३-० को पराजय बेहोरेको टर्की पनि समूह चरण पारगर्न आजको खेल जित्नै पर्ने दबाबमा छ । त्यस्तै, पहिलो खेलमा स्वीटजरल्यान्डसँग १-१ गोलको बराबरीमा रोकिएको वेल्स पनि समूह चरणको अन्तिम खेलमा इटालीको सामना गर्नुपर्ने भएकाले आजको खेलमा तीन अंक बटुल्न चाहन्छ ।

अन्तिम पटक यी दुई टोलीको १९९७ मा विश्वकप छनोटका दौरान इस्तानबुलमा भेट भएको थियो । उक्त खेलमा घरेलु टोली टर्कीले वेल्समाथि ६-४ को रोमाञ्चक जित हासिल गरेको थियो । वेल्सले ४० वर्षयता टर्कीलाई हराउन सकेको छैन ।

१९८१ मा मा भएकव विश्वकप छनोटमा वेल्सले अन्तिम पटक टर्कीलाई १-० ले पराजित गरेको थियो ।