वेल्स र स्वीटजरल्यान्डबीचको पहिलो हाफ गोलरहित बराबरी

काठमाडौं । युइएफए युरो २०२० को समूह ‘ए’ अन्तर्गत अजरबैजानको बाकुमा जारी खेलको पहिलो हाफमा स्वीटजरल्यान्ड र वेल्सले गोलरहित बराबरी खेलेका छन् ।

खेलमा दुवैतर्फबाट गोलका लागि केही मौका सिर्जना भए पनि फिनिसिङमा चुक्दा दुवै टोली अग्रता लिन असफल रहे ।

स्वीटजरल्यान्डका रिकार्डो रोड्रिग्वेजले छैठौं मिनेटमा बायाँतर्फ गरेको प्रहार फ्रेममा परेको थिएन । त्यस्तै, १५औं मिनेटमा वेल्सका ड्यानियल जेम्सको क्रसमा किफर मुरेले हेडरमार्फत गरेको प्रहारमा स्वीटजरल्यान्डका गोलकिपर यान सोमर बाधक बने ।

२०औं मिनेटमा स्वीटजरल्यान्डका शेर्डन शकिरीले कर्नरमार्फत गरेको क्रसमा फ्याबियन क्रसले सुन्दर फ्लिक प्रहार गरेका थिए । तर, वेल्सका गोलकिपर ड्यानी वार्डले उक्तृष्ट बचाउ गरे ।

गत संस्करणको सेमिफाइनलमा पुगेर पोर्चुगलसँग पराजित भएको वेल्सलाई आजको खेलमा स्वीटजरल्यान्डले दबाबमा राखेको छ ।