मानव बेचबिखन प्रभावितको भेलाले वागमती प्रादेशिक सञ्जाल गठन – Nepal Press

मानव बेचबिखन प्रभावितको भेलाले वागमती प्रादेशिक सञ्जाल गठन

काठमाडौं । मानव बेचबिखन प्रभावितहरूको वागमती प्रदेशस्तरीय भेलाले प्रादेशिक सञ्जाल गठन गरेको छ । शनिवार काठमाडौंमा सम्पन्न भेलाले फूलमाया छुमीको संयोजकत्वमा मानव बेचबिखन प्रभावितहरूको वागमती प्रदेशस्तरीय सञ्जाल गठन गरेको हो ।

शक्ति समूहको संयोजनमा भएको भेलामा राष्ट्रिय मानव अधिकार आयोगकी सदस्य लिली थापा, मेलम्ची नगरपालिका उपप्रमुख भगवती नेपाल, शक्ति समूहकी अध्यक्ष चरिमाया तामाङ, शक्ति समूहकी कार्यकारी निर्देशक बालकुमारी दर्लामीलगायतले मानव बेचबिखन प्रभावितहरूलाई समाजमा रोजगारी र पुनःस्थापनाको लागि राज्यबाटै पहल हुनुपर्ने बताएका थिए ।

शक्ति समूहको आयोजनामा दुई वर्षअघि मानव बेचबखिनबाट प्रभावितहरुको सातै प्रदेशको सहभागितामा भएको भेलाले चरिमाया तामाङको नेतृत्वमा राष्ट्रिय सञ्जाल गठन गरेको थियो । यस्तो सञ्जाल प्रदेश र स्थानीय तहसम्म विस्तार गरिने तामाङले बताइन् ।

हालसम्म सुदूरपश्चिम, लुम्बिनी र वागमतीमा प्रदेशस्तरीय मानव बेचबिखन प्रभावितहरुको सञ्जाल गठन भइसकेको शक्ति समूहले जनाएको छ । सञ्जालले बेचबिखन प्रभावितहरूलाई कानुनी अधिकारको लागि वकालत, उद्दार, स्वदेश फिर्ती, पुनःस्थापनना, शिक्षा, स्वास्थ्य र रोजगारीको अवसरका लागि दबाब दिनेछ ।

मानव अधिकार आयोगको अघिल्लो वर्षको प्रतिवेदन अनुसार नेपालबाट करीव डेढ लाख महिला तथा पुरुष बेचबिखनको जोखिममा छन् । तीमध्ये पत्येक वर्ष ३५ हजार वैदेशिक रोजगारी,मनोरन्जन क्षेत्र र बाल श्रमका रुपमा मानव बेचबिखनमा पर्ने गरेको आयोगको प्रतिवेदनमा उल्लेख छ ।

प्रतिक्रिया

Leave a Reply

Your email address will not be published.