विराटनगर महानगरमा तीन मेयरका उम्मेदवारसहित २३ जनाले लिए उम्मेदवारी फिर्ता

विराटनगर । विराटनगर महानगरपालिकाको मेयरसहित विभिन्न पदमा उम्मेदवारी दर्ता गराएका २३ जनाले उम्मेदवारी फिर्ता लिएका छन् ।

उम्मेदवारी फिर्ता लिनेमा तीन जना मेयरका उम्मेदवार रहेका छन् । यस्तै, उपमेयर २, वडाध्यक्ष ७ र वडा सदस्य पदका ११ जना रहेको मुख्य निर्वाचन अधिकृतको कार्यालय विराटनगरले जनाएको छ ।

मेयरतर्फ राष्ट्रिय जनमोर्चाका टङ्क प्रसाद गौतम, नेपाल परिवार दलका महेश निरौला र स्वतन्त्र उम्मेदवार केमुना मैनालीले उम्मेदवारी फिर्ता लिएका छन् ।

यस्तै, उपमेयर तर्फ नेपाल परिवार दलकी दीपा पोखरेल र स्वतन्त्र उम्मेदवार उद्धव प्रसाद कोइरालाले आफ्नो फिर्ता लिएको कार्यालय सूचना अधिकारी हेमबहादुर बुढाथोकीले बताए ।

कुल ७४४ मध्ये २३ जनाको उम्मेदवारी फिर्ता हुँदा अब विराटनगरमा ९७ पदका लागि हुने निर्वाचनमा ७२१ जनाको उम्मेदवारी कायम भएको छ ।

निर्वाचन अधिकृतको कार्यालयले उम्मेदवारहरूको अन्तिम नामावली प्रकाशन गरिसकेको छ ।

उम्मेदवारहरूलाई निर्वाचन चिन्ह भने शनिवार प्रदान गरिने कार्यालयले जनाएको छ ।