दैलेखको आठबीस नगरमा एमालेबाट मेयरमा १३ र उपमेयरमा ७ जनाको दावी पेश

सुर्खेत । नेकपा एमाले आठबीस नगर कमिटिको आज बसेको सचिवालय बैठकमा नगर प्रमुख हुन चाहनेहरुको लर्को लागेको छ । नगर कमिटि उपाध्याक्ष हिक्मत बस्नेतका अनुसार नगर प्रमुखमा १३ जना तथा उपप्रमुखमा सात जनाको दाबी परेको हो ।

उनका अनुसार नगरप्रमुखमा उम्मेदवारी दिनेहरुमा हर्कबहादुर शाही, तर्कबहादुर बडुवाल, ओमजंग शाही, मिनबहादुर शाही रहेका छन् ।

यस्तै, तेजबहादुर महतारा, खड्गराज उपाध्याय, पदम माझी, नेत्र विष्ट, जीवन शाहीले पनि नगरप्रमुखका लागि दावी गरेका छन् । दिपेन्द्रराज खनाल, पर्वसिंह विश्वकर्मा, सिंहराज शाही र लालसरा थापाले पनि नगरप्रमुखको उम्मेदवारीमा दावी गरेका छन् ।

नगर उपप्रमुखतर्फ कमला थापा, गोमता विक, नामसरा कार्की, जौधरा खनाल आचार्यले दाबी गरेका छन् । यस्तै, कल्पना थापा, गोमा उपाध्याय र सिता सुनारले उपप्रमुखमा दाबी गरेको उपाध्याक्ष बस्नेतले बताए ।

उनका अनुसार आज बसेको बैठकमा नाम संकलन गर्ने काम भएको हो । ‘आज हामीले नगरप्रमुखको उम्मेदवार बन्नेहरुको नामावली संकलन गरेसँगै सहमतिको प्रयास सुरु गर्ने बाटो खुलेको हो ।’ उनी भन्छन्, ‘२९ गते भित्र हामी सके सर्वसम्मत नभए मतदानबाट भएपनि उम्मेदवारको नाम टुंगो लगाएर जिल्ला कमिटिमा पठाउँछौं ।’

बस्नेतका अनुसार नगर कमिटिले नगर प्रमुख र उपप्रमुखमा तीन-तीन जनाको नाम सिफारिस गर्ने भएको छ । सहमति भएको खण्डमा भने दुवै पदका लागि एक-एक जनाको नाम पठाइने तयारी छ ।