२४ घण्टा पनि टिकेन अभया सुब्बाको ध्वाँस, सन्दीपविरुद्धको पोस्ट हटाइन् – Nepal Press

२४ घण्टा पनि टिकेन अभया सुब्बाको ध्वाँस, सन्दीपविरुद्धको पोस्ट हटाइन्

काठमाडौं । नेपाली मूलकी भारतीय गायिका अभया सुब्बा वाइजे (पछि स्वीस नागरिकसँग विहे गरेकी) ले हिजो आफ्नो फेसबुकमा एउटा पोस्ट गर्दै क्रिकेटर सन्दीप लामिछानेलाई समर्थन गर्नेहरुले आफूलाई फ्रेन्ड लिस्टबाट हटाउन ‘ध्वाँस’ दिइन् । तर, उनको ध्वाँस २४ घन्टा पनि टिक्न सकेन ।

आफ्नो पोस्टमा अत्यधिक नकारात्मक टिप्पणीहरु आएपछि अभयाले पोस्ट नै डिलिट गरिदिएकी छन् । उनले कुनै क्षमायाचना भने गरेकी छैनन् ।

अभयाले आफ्नो स्टाटसमा लेखेकी थिइन्, ‘सन्दीप लामिछानेका सबै फ्यान र समर्थकहरूले मलाई अनफ्रेन्ड गरिदिनु होला । म मेरो वरिपरि नीच अनुयायीहरू हुनुभन्दा केही असल साथीहरू होउन् भन्ने चाहन्छु ।’

बलात्कारको मुद्दा खेपिरहेका सन्दीपलाई हालै उच्च अदालत पाटनले निर्दोष ठहर गरेको थियो । सफाइ पाइसकेको खेलाडीमाथि अभयाको टिप्पणीले सन्दीपका समर्थकलाई आक्रोशित बनाएको थियो । कतिले अभयाविरुद्ध गालीगलौजको वर्षा गरेका थिए ।

त्यसो त सांगीतिक क्षेत्रमा चर्चा पाउन नसकिरहेकी अभयाले ‘पब्लिक एटेन्सन’ को खोजीमा यो स्टाटस लेखेको आरोप लागेको छ । केही दिनअघि उनले लेखेको स्टाटसले पनि यो आरोपलाई बल पुग्छ । उनले ‘आफ्नो फेसबुक रिच सेलाउँदै गएकाले आफूले अब केही अन्टसन्ट पोस्ट गर्न सक्ने’ भनेर लेखेकी थिइन् । यो पोस्ट पनि उनले अहिले हटाएकी छन् ।

को हुन् अभया ?

अभया दार्जिलिङमा जन्मेकी हुन् । मुम्बइमा बसेर पढेकी उनले नेपाल आएर एफएममा आरजेको काम सुरु गरेकी थिइन् । उनले सांगीतिक करिअर भारतमै सुरु गरे पनि खासै सफलता पाइनन् । दुई दशकदेखि उनी संगीतमा सक्रिय छिन् ।

उनको अभया एन्ड स्टिम इन्जिन्स नामको ब्यान्ड छ । तर नेपालमा धेरैले उनलाई भ्वाइस अफ नेपालको जज बनेपछि चिनेका हुन् । उनले नेपालमै जन्मेका स्वीस मुलका आर्किटेक्ट केइ वीजेसँग बिहे गरेकी छन् । अभया अतिवादी फेमिनिस्टका रुपमा परिचित छिन् ।


प्रतिक्रिया

One thought on “२४ घण्टा पनि टिकेन अभया सुब्बाको ध्वाँस, सन्दीपविरुद्धको पोस्ट हटाइन्

Leave a Reply

Your email address will not be published. Required fields are marked *