माओवादीले केन्द्रीय सदस्यलाई निर्वाचन क्षेत्र र प्रदेश कमिटीमा खटाउने

काठमाडौं । नेकपा (माओवादी केन्द्र)ले पार्टीको महाधिवेशनको निर्णयअनुसार पार्टीका कमिटीलाई पूर्णता दिने भएको छ । माघ १२ गतेदेखि २१ गतेसम्म पार्टी कार्यालय पेरिसडाँडामा बसेको पार्टीको स्थायी समिति बैठकले यस्तो निर्णय गरेको हो ।

बैठकले पार्टीका केन्द्रीय सदस्यलाई ३ महिनाका लागि संघीय र प्रदेश निर्वाचन क्षेत्र तथा प्रदेश कमिटीमा जिम्मेवारी तोकेर पठाउने निर्णय गरेको हो । पार्टीले १६५ प्रतिनिधि सभा निर्वाचन क्षेत्र र ३३० प्रदेश निर्वाचन क्षेत्रमा एक–एक जना खटिँदा ४९५ जनालाई संगठन निर्माणमा प्रत्यक्ष जोड्ने लागेको हो ।

कार्यक्षेत्रमा संगठन निर्माण बाहेक उत्पादन, जनसम्बन्ध र स्कुलिङको कामको नेतृत्व गर्नुपर्ने पनि स्थायी समिति बैठकले निर्णय गरेको छ । यसबाट आउने परिणामको आधारमा कार्य सम्पादन मूल्यांकन गरी पार्टीको जिम्मेवारी तोकिने छ । संगठनलाई थप व्यवस्थित गर्न अध्ययन, अनुसन्धान र छलफल एवम कार्यशाला गरी संगठन विभागले २ महिनाभित्र विस्तृत प्रतिवेदन तयार पार्नेछ ।

सबै तहमा पार्टीको बैठक एजेण्डा छलफल, निर्णय प्रक्रिया, पूर्ण जनवादी वातावरणमा अगाडी बढाउने र आफ्नो तहमा व्यवस्थापन, पार्टीको विधि पद्धतीबारे निर्णय गरी कार्यान्वनय गरिने बताइएको छ ।