वीरेन्द्रनगर नगरपालिका-९ का वडाध्यक्षद्वारा अक्षयकोष स्थापना

सुर्खेत । वीरेन्द्रनगर नगरपालिका वडा नम्बर ९ का वडाध्यक्ष सुरेश मानन्धरले हालसम्म आफूले पाएको सरकारी सेवा सुविधाबाट तीन लाख तेत्तीस हजार तीन सय तेत्तीस बराबरको अक्षयकोष स्थापना गरेका छन् ।

अक्षयकोषबाट विपन्न विद्यार्थीलाई छात्रवृत्ति दिने गरी व्यवस्था मिलाइएको छ । यसअघि बडा नम्बर ३ का वडाअध्यक्षले पनि अक्षयकोष स्थापना गरेका थिए ।

वडाअध्यक्ष मानन्धरले वडाभित्रका तीन वटा सामुदायिक विद्यालयमा कांग्रेसका पूर्व वडासभापति लोकबहादुर विसीको सम्झनामा ‘लोकबहादुर विसी गरिव जेहेन्दार’ छात्रवृत्ति कोषको स्थापना गरेका हुन ।

स्व. लोकबहादुर विसी दैलेखको डाँडापराजुलमा जन्मिएर २०३० शिक्षण पेशा सुरु गरेका थिए ।

‘वडाध्यक्षमा निर्वाचित भएपछि प्राप्त तलव, भत्तावापतको रकमबाट नेपाल राष्ट्रिय आधाभूत विद्यालय, शिव मावि र कोपिला माविमा एक लाख ११ हजार १११ रुपैयाँको छुट्टाछुट्टै अक्षयकोष स्थापना गरेको छु,’ उनले भने, ‘कार्यकाल रहँदासम्म प्राप्त रकम पनि सबै विद्यालयमा समान तरिकाले जम्मा गर्नेछु ।’

उनले सामुदायिक विद्यालयमा अध्ययनरत गरिव तथा विपन्न परिवारका बालबालिकाका लागि छात्रवृत्ति दिने उद्देश्यले अक्षयकोष स्थापना गरिएको बताए ।