एमाले अध्यक्ष ओलीका सबै बैठक र भेटघाट पार्टी कार्यालयबाटै

काठमाडौं । पूर्वप्रधानमन्त्री तथा नेकपा (एमाले) का अध्यक्ष केपी शर्मा ओलीले छलफल तथा भेटघाट थापाथलीस्थित पार्टी केन्द्रीय कार्यालयबाटै शुरू गरेका छन् ।

ओलीले बिहीबार केन्द्रीय कार्यालयमा आएर पार्टी नेता तथा कार्यकर्तासँग भेटघाट गरेका छन् । प्रधानमन्त्री रहँदा बालुवाटारबाटै अधिकांश बैठक र भेटघाट हुँदै आएकोमा अब पार्टीका सम्पूर्ण बैठक तथा भेटघाट पार्टी केन्द्रीय कार्यालयबाटै हुने कार्यालय सचिव शेरबहादुर तामाङले जानकारी दिए ।

ओली सक्रिय रूपमा कार्यालयमा उपस्थित हुनसक्ने अवस्था दर्शाउँदै तामाङले भने, ‘पार्टी केन्द्रीय कार्यालयमा अलि व्यवस्थित गरेर उहाँहरुलाई अर्को कुनै अप्ठ्यारो नहोस्, भीडभाड नहोस् भन्ने कुरालाई ध्यानमा राखेर कार्यकक्षहरुको व्यवस्था भएको छ । उहाँको भेटघाट गर्ने रुमको व्यवस्था छ । हामीले व्यवस्थित ढंगले नै भेट्ने र अरु पार्टीका कामहरु गर्ने वातावरण केन्द्रीय कार्यालयमा तयार भएको छ ।’

सचिव तामाङले पार्टीको बैठक तथा कार्यक्रमहरू भर्चुअल माध्यमबाट गर्ने व्यवस्था मिलाइएको पनि जानकारी दिए ।