‘भाइरल भइदियो’ का गायक मानसराजको ‘माया माया हो’ को भिडिओ सार्वजनिक

काठमाडौं । ‘भाइरल भइदियो’ बोलको हिट गीतका गायक मानसराज बोहराको नयाँ गीत ‘माया माया हो’ को भिडिओ सार्वजनिक गरिएको छ ।

शुक्रबार रिलिज गीतको शब्द र संगीत मानसराजकै छ । एरेन्ज उदयराज पौडेल र मिक्सिङ तथा मास्टरिङ नरेन्द वियोगीले गरेका हुन् । गम्भिर विष्टको कोरियोग्राफी तथा निर्देशन रहेको म्युजिक भिडिओमा प्रेम र रोमान्सका रमाइला किस्सा प्रस्तुत गरिएको छ ।

मोडल गीता ढुंगानासँग गायक स्वयम्‌ले अभिनय गरेको यो भिडिओमा आफूले मन पराएकी मायालुलाई लुकी लुकी चिहाउने प्रेमीको कथालाई निर्देशक विष्टले वर्णन गरेका छन् । आफ्नो रूपसमेत परिवर्तन गरेर प्रेमिकासामु जाने दृष्यमा दुवै गज्जबले खुलेका छन् ।

नयाँ गीतको भिडिओमा निकै मिहिनेत गरेको बताउँदै मानसराजले सकारात्मक प्रतिक्रिया आइरहेको बताएका छन् । भिडिओको छायांकन पवन शिस्लुङ्ग र सम्पादन प्रवीण भट्टले गरेका हुन् । सुरेन्द्र बसेलको सहनिर्देशनमा बनेको म्युजिक भिडिओ मानसराजकै अफिसियल च्यानलबाट सार्वजनिक गरिएको छ ।

मानसराज गायनका अलावा थिएटर अभिनयमा पनि सक्रिय छन् । उनका गीतहरू फिल्म ‘रेशम फिलिलि’ को पारि त्यो डाँडामा हेर घाम लाग्यो घमाइलो, ‘डायरी’ को माया मायामा, हिरो, लैलै राजकुमारीलगायत चर्चामा छन् ।