चलचित्र ‘यो मन त मेरो नेपाली हो’ को छायाङ्कन सुरु

काठमाडौं । चलचित्र ‘यो मन त मेरो नेपाली हो’ को छायाङ्कन सुरु भएको छ । दमकको पशुपतिनाथ मन्दिरमा सोमबार पूजा गरेर शुभमुहुर्तसँगै चलचित्रको छायाङ्कन सुरु गरिएको छ ।

यस फिल्मको मुख्य पात्रहरू रोशन श्रेष्ठ, विल्सन विक्रम राई, बुद्धि तामाङ ‘हैट’, विजय बराल ,आयुषा समाल, सञ्जीत भण्डारी, मेग सुवेदी, नारायण खाती रहेका छन् ।

पद्मा ईश्वर ईन्टरटेन्मेन्ट प्रालिको प्रस्तुतिमा निर्माण हुन् लागेको चलचित्र ‘यो मन त मेरो नेपाली हो’ ले विदेशमा रहेका नेपालीको मुद्दालाई उठान गर्दैछ ।

अमेरिकामा रहेका नेपाली भुटानी साहित्यकार मित्र प्रधान (नर) ले निर्देशन गर्ने यो चलचित्रले नेपाली भाषा, साहित्य, कला, यसको इतिहास, महत्त्व र नेपाली भाषाको गौरवसँगै नेपाली को हुन् भन्ने विषयवस्तुलाई उठान गर्न खोजेको निर्देशक प्रधानले बताए ।

चलचित्रमा अमेरिका, म्यानमार, भुटान र इन्डिया गरी चार देशका चार जना नेपाली भाषी अभियन्ताहरु नेपाल आएर, नेपाली भाषाको अध्ययन अनुसन्धान गरी नेपाली भाषाको महत्त्व, नेपाली वीरता र गोर्खालीहरू को हुन् ? नेपालीहरू कसरी भुटान म्यानमार, इन्डियासम्म पुगे र त्यहाँका नेपालीहरूको अवस्था कस्तो छ भनेर यो फिल्मले बोल्ने लेखक शिवम् अधिकारीले बताउनु भयो ।

फिल्मको पहिलो छायाँङ्कन पाचथरबाट सुरु गरी झापा हुँदै, सिक्कीम, म्यानमार, देहरादुन, क्यानडा, अमेरिका लगायतको देशहरूमा हुनेछ ।