कम्पनीले २८६ गुणा बढी तलब हालेपछि….

काठमाडौं । कम्पनीले आफ्ना एक कर्मचारीलाई भूलवस २८६ महिनाको तलब एकैपटक हाल्दिएको छ । आफ्नो खातमा उक्त रकम आएको जानकारी पाएपछि ती कर्मचारीले कम्पनीबाटै राजीनामा दिएका छन् ।

सुरुमा ती कामदारले बढी आएको उक्त रकम फिर्ता गर्ने वाचा गरेका थिए । तर, पछि ती कर्मचारी एक वकिलका साथ कम्पनीमा आए र राजीनामा दिएर हिँडे ।

यो घटना हो, चिलीको कन्सोर्सियो इन्डस्टेरियल डे अलिमेटोस नामक कम्पनीको । उक्त कम्पनी चिलीका ठूला कम्पनीमध्ये एक रहेको बताइन्छ ।

मिडिया रिपोर्टका अनुसार ती कामदारको मासिक तलब पाँच लाख पेसो अर्थात नेपाली रुपैयाँ लगभग ५० हजार थियो । उनले एकै पटकमा साढे १६ करोड पेसो अर्थात २ करोड बढी नेपाली रुपैयाँ पाएका थिए ।

अहिले कम्पनीले उनीविरुद्ध कानुनी प्रक्रियालाई अगाडि बढाएको बताइएको छ ।