ऊर्जामा व्यापक सरुवा : विद्युत विकास विभागमा सन्दीप देव, मधुकर मन्त्रालयमा

काठमाडौं । ऊर्जामन्त्री पम्फा भुसालले मन्त्रालयका उच्च पदस्थ अधिकारीहरूको सरुवाबाट आफ्नो काम अघि बढाएकी छन् । भुसालले नेपाल विद्युत प्राधिकरणका कार्यकारी निर्देशक हितेन्द्रदेव शाक्यसँग भने राजीनामा मागेकी छन् ।

भुसाल मन्त्री भएलगत्तै ऊर्जा मन्त्रालयअन्तर्गतको महत्वपूर्ण मानिने विद्युत विकास विभागको महानिर्देशकमा सहसचिव सन्दीपकुमार देवलाई पठाइएको छ । यसअघिका महानिर्देशक नविनकुमार सिंहको  त्यहाँबाट सरुवा गरिएको मन्त्रीनिकट स्रोतले जनाएको छ ।

सिंह दुई पटक विद्युत विकास विभागको महानिर्देशक भएका व्यक्ति हुन् । उनलाई बुधबारदेखि नै लागु हुनेगरी जल तथा ऊर्जा आयोगमा सरुवा गरिएको छ । सन्दीपकुमार देव यसअघि विद्युत विकास विभागको उपमहानिर्देशक थिए ।

वर्षमान पुन ऊर्जामन्त्री भएका बेला मन्त्रालयमा सरुवा भएका देव ९ महिनापछि सोही विभागका प्रमुख भएर फर्केका छन् । देवले बुधबारदेखि नै विभागमा कार्यभार सम्हालेका छन् ।

त्यस्तै ऊर्जामन्त्री भुसासलले सुनकोशी मरिण डाइभर्जन आयोजना प्रमुख सुशील आचार्यलाई जलस्रोत तथा सिँचाइ विभागको महानिर्देशकमा सरुवा गरिएको छ । विभागका यसअघिका महानिर्देशक मधुकरप्रसाद राजभण्डारी मन्त्रालयमा सरुवा भएका छन् ।