रियल मड्रिडलाई हराउँदै एथ्लेटिको विल्बाओ स्पेनिस सुपर कपको फाइनलमा

एजेन्सी । सेमिफाइनलमा साविक विजेता रियल मड्रिडलाई २–१ गोलले हराउँदै एथ्लेटिको विल्बाओले स्पेनिस सुपर कपको फाइनलमा बार्सिलोनासँगको भेट निश्चित गरेको छ ।

विल्बाओका लागि स्ट्राइकर राहुल गार्सिया ले २ गोल गरेका थिए । रियलका करिम बेन्जिमाले खेलको अन्त्यतिर १ गोल फर्काएका हुन् ।

बार्सिलोनाले बुधबार राती रियल सोसिडाडलाई पेनाल्टी शुटआउटमा पराजित गरी फाइनलमा स्थान बनाएको हो । फाइनल खेल आइतबार सेभिल्लामा हुनेछ ।

राहुलले १८ औं मिनेटमा विल्बाओका लागि पहिलो गोल गरेका थिए । ३८ औं मिनेटमा उनैले पेनाल्टीमार्फत अग्रता दोब्बर पारे । रियलका लुकास माज्क्वेजले बक्सभित्र इनिगो मार्टिनेजलाई फल गरेपछि विल्बाओले पेनाल्टी पाएको हो ।

दोस्रो हाफको अन्त्यतिर बेन्जेमाले रियलका लागि गोल गरे । सुरुमा रेफ्रीले अफसाइडको इशारा गरे पनि भिडियो असिस्टेन्ट रेफ्रीबाट त्यस गोलले मान्यता पाएको हो ।