दैलेखमा बस दुर्घटना हुदाँ ४ जनाको मृत्यु, ४७ जना घाइते

सुर्खेत । दैलेखमा बुधबार राति बस दुर्घटना हुँदा ४ जनाको मृत्यु भएको छ । कालीकोटको जितेगडाबाट सुर्खेत आउँदै गरेको म १ ख ६६० नम्बरको बस दैलेखको आठबीस नगरपालिका २ सिस्नेमा दुर्घटना हुँदा ३ जनाको घटनास्थलमा र एक जनाको उपचारका क्रममा मृत्यु भएको हो ।

घाइतेमध्ये ९ जनाको दैलेखमा सामान्य उपचार भइरहेको र ३८ जनालाई थप उपचारका लागि सुर्खेत पठाएको दैलखेका प्रमुख जिल्ला अधिकारी हरि प्याकुरेलले नेपाल प्रेसलाई जानकारी दिए । उनका अनुसार सुर्खेत पठाइएका पाँच जनाको अवस्था गम्भिर रहेको छ ।

उनले भने, ‘कति जना बसमा सवार थिए भन्ने एकिन तथ्यांक आइसकेको छैन । सामान्य अवस्थाका घाइतेको घटनास्थल नजिकैको अस्पतालमा उपचार भइरहेको छ । गम्भिर घाइतेलाई उपचारका लागि सुर्खेत पठाईसकिएको छ । नेपाल प्रहरी र शसस्त्र प्रहरीले उद्धारको काम गरिरहेको छ ।’ अँध्यारो भएकोले उद्धार कार्यमा कठिनाइ भएको प्रमुख जिल्ला अधिकारी प्याकुरेलले बताए । उनका अनुसार बस दुर्घटनाको कारण खुलिसकेको छैन ।

जिल्ला प्रहरी कार्यालय दैलेखका अनुसार दुर्घटना राति ८ बजे भएको हो । प्रहरीका अनुसार बस ५० मिटर तल खसेको छ ।