महाधिवेशनपछि पनि कांग्रेसमा गुट बैठक, गगन-धनराजसमेत सहभागी (तस्बिरहरु)

काठमाडौं । नेपाली कांग्रेसमा सर्वाधिक मतका साथ महामन्त्री निर्वाचित भएका गगनकुमार थापा गुट वैठकमा सहभागी भएका छन् । आफ्नो जितपछि उनले पार्टीभित्र अब गुट नरहने र आफू सबैको साझा महामन्त्री भएको अभिव्यक्ति दिएका थिए ।

थापाले कांग्रेस महाधिवेशनमा शेखर कोइरालाको गुटबाट चुनाव लडेका थिए । झण्डै दुईतिहाइ मताक साथ उनले महामन्त्रीमा जित हासिल गरेका हुन् । जितेलगत्तै उनले अब पार्टीमा गुट नरहने र आफ्नो समूहले भागबण्डा पनि नखोज्ने बताएका थिए ।

तर, पार्टी सभापति शेरबहादुर देउवाले केन्द्रीय सदस्यहरुमा मनोनयन गरेपछि आफ्नो समूहलाई बाइपास गरिएको भन्दै कोइराला समूह असन्तुष्ट छ । यही विषयमा छलफल गर्न कोइरालाले आफ्नो गुटको वैठक डाकेका हुन् ।

यो पनि पढ्नुहोस्ः गुटबन्दी गर्दिन भन्ने शेखरले किन बोलाए गुटको बैठक ?

राजधानीको एउटा होटलमा राखिएको वैठकमा कोइराला पक्षबाट महाधिवेशनमा जितेका र हारेका नेताहरु उपस्थित भएका छन् । कोइराला पक्षबाट उपसभापतिमा विजयी धनराज गुरुङ पनि बैठकमा सहभागी भएका छन् ।

यसैगरि पराजित उपाध्यक्ष र महामन्त्रीमा पराजित उम्मेदवारहरु डा. चन्द्र भण्डारी र डा. मिनेन्द्र रिजाल पनि वैठकमा छन् । रिजालले पार्टीमा पराजियपछि रक्षामन्त्रीबाट राजीनामा दिएका थिए ।

सभापति देउवाले केन्द्रीय सदस्यमा मनोनयन गर्ने क्रममा शेखर कोइराला पक्षधर नेताहरुलाई स्पेस दिएका छैनन् । आफ्नो समूहबाट पदाधिकारीमा पराजित नेताहरुलाई समेट्दा उनले शेखर समूहलाई पन्छाएका हुन् ।

कोइरालाले आजको वैठकमा सभापतिको लाइक र डिस्लाइकका आधारमा व्यक्ति छनोट गरिएमा दुर्घटना हुने चेतावनी दिएका छन् । हिजोपनि काेइराला समूहकाे गुटको बैठक बसेकाे थियाे ।