युनाइटेड र ब्रेन्टफोर्डको खेल स्थगित

काठमाडौं । इङ्लिस प्रिमियर लिगअन्तर्गत मंगलबार राति हुने तय भएको म्यानचेस्टर युनाइटेड र ब्रेन्टफोर्डबीचको खेल स्थगित हुने भएको छ । ओल्ड ट्राफोर्डमा कोरोना भाइरसको संक्रमण फैलिन थालेपछि यो खेल स्थगित हुने भएको हो ।

मेडिकल एडभाइजरहरूको सल्लाहअनुसार ओल्ड ट्राफोर्डमा म्याच हुनु उचित नहुने बताएपछि खेल स्थगित भएको प्रिमियर लिगले बताएको छ । यसअघि युनाइटेडले आफ्नो ट्रेनिङ मैदान क्यारिङ्टनमा सबै कार्य रोकेको थियो ।

गत साता प्रिमियर लिगका ४२ जना खेलाडी तथा स्टाफमा कोरोना भाइरसको संक्रमण पुष्टि भएको थियो । ब्राइटन, टोटेनह्याम, लेस्टर एस्टोन भिल्ला र नर्विचले कोरोना भाइरस संक्रमण पुष्टि भएको बताएका छन् । गतहप्ता हुने तय भएको टोटेनह्याम र ब्राइटनबीचको खेल पनि कोभिड कै कारण स्थगित भएको थियो ।