नामिवियालाई हराएपछि पाकिस्तान ट्वान्टी-२० विश्वकपको सेमिफाइनलमा

एजेन्सी । नामिवियामाथि ४५ रनको जितपछि पाकिस्तानले आईसीसी ट्वान्टी–२० विश्वकपअन्तर्गत समूह २ बाट सेमिफाइनलमा स्थान बनाएको छ ।

पाकिस्तानले लगातार चौथो जितपछि ८ अंक जोडेको छ । गएराति आबुधावीमा १९० रनको लक्ष्य पछ्याएको नामिवियालाई १४४ रनमै रोकेपछि पाकिस्तानले एक खेल अगावै अन्तिम चारमा स्थान सुरक्षित गरेको हो ।

टस जितेर पहिले ब्याटिङ गरेको पाकिस्तानका लागि फेरि एकपल्ट ओपनरद्वय मोहम्मद रिजवान र कप्तान बाबर आजमले सानदार प्रदर्शन गरे । यसअघि भारतविरुद्ध पनि यी दुईले अर्धशतक प्रहार गरेका थिए ।

रिजवानले ५० बलमा ८ चौका र ६ छक्कासहित ७९ तथा आजमले ४९ बलमा ७ चौकासहित ७० रनको योगदान गरे ।

मोहम्मद अफिजले पनि १६ बलमा ३२ रन जोडेपछि पाकिस्तानले १८९–२ को विशाल योगफल खडा गरेको थियो ।

जवाफमा नामिविया १४४–५ मा सीमित भयो । उसका लागि मध्यक्रमका डेभिड विइसेले ४३ रन तथा क्रिग विलियन्सले ४० रन बनाउनुबाहेक अन्यले लामो समयसम्म क्रिजमा विताउन सकेनन् । सुपर १२ को खेलमा नामिवियाले स्कटल्याण्डबाहेक अरुलाई हराउन सकेको छैन ।