राजनीतिक अवधारणा सार्वजनिक गर्दै विश्वप्रकाश

काठमाडौं । नेपाली कांग्रेसका प्रवक्ता एवं महामन्त्री पदका प्रत्यासी विश्वप्रकाश शर्माले आज आफ्नो अवधारणा सार्वजनिक गर्दैछन् ।

वीपी जयन्तीको दिन सुन्दरीजलबाट महामन्त्री पदमा लड्ने घोषणा गरेका शर्माले गृहजिल्ला झापामा आयोजित कार्यक्रमबाट आफ्नो अवधारणा सार्वजनिक गर्ने भएका हुन् ।

‘हिजो राजनैतिक परिवर्तन, अब राजनीतिमा परिवर्तन’ भन्दै शर्माले आफ्नो अवधारणा सार्वजनिक गर्न लागेका हुन् । कांग्रेसको महामन्त्रीका रूपमा आफूले उम्मेदवारी घोषणा गरेसँगै राजनीतिक अवधारणा सार्वजनिक गर्नु अपरिहार्य ठानेको शर्माले बताए ।

‘नेपाली जनताको ७ दशक लामो सपना साकार भएर संविधानसभाबाट संविधान बनेको दिन मेरो जन्मभूमि झापाका जनताको माझबाट राजनीतिबारे मेरा अवधारणा सार्वजनिक गर्न चाहेको हुँ’, शर्माले नेपाल प्रेससँग भने ।

कांग्रेसको महाधिवेशन मंसिर ९ गतेदेखि १३ गतेसम्म हुँदैछ । सभापति शेरबहादुर देउवाका विश्वासपात्र शर्माले एकल उम्मेदवारी घोषणा गरेसँगै उनी उपसभापति विमलेन्द्र निधिसँग नजिकिएको चर्चा कांग्रेसवृत्तमा भइरहेको छ ।