योजना आयोगमा प्रधानमन्त्री पत्नीको पकड, दुई व्यापारिक साझेदार नियुक्त गर्न सफल

काठमाडौं । राष्ट्रिय योजना आयोगमा प्रधानमन्त्री पत्नी डा. आरजु राणा देउवाका दुई व्यापारिक साझेदारले मुख्य जिम्मेवारी पाएका छन् । मुलुकको विकास तथा सरकारका नीतिहरू तय गर्ने मुख्य निकायमा प्रधानमन्त्री पत्नीले आफ्नो वर्चश्व कायम गरेकी छन् ।

आरजु राणा देउवा अध्यक्ष रहेको युलेन्स स्कुल नेपालकै सबैभन्दा महँगो शुल्क लिने शिक्षण संस्थामा पर्छ । सो शैक्षिक प्रतिष्ठानका एक जना बोर्ड सदस्य डा. विश्व पौडेल योजना आयोगको उपाध्यक्ष छन् भने पछिल्लो मन्त्रिपरिषद बैठकले राणाकै अर्का व्यापारिक साझेदारलाई पनि योजनामा आयोगमा नियुक्ति दिएको छ ।

युलेन्स एजुकेशन फाउन्डेसनका प्रमुख कार्यकारी अधिकृत अरनिको पाण्डे योजना आयोगको बरिष्ठ सल्लाहकारमा नियुक्त भएका हुन् । पाण्डेले आफ्नो प्रोफाइमा पनि नयाँ पदको जानकारी दिइसकेका छन् । यसअघि आयोगमा वरिष्ठ सल्लाहकार राख्ने प्रचलन नरहे पनि यसपटकबाट सिर्जना गरिएको हो ।