माओवादी बैठकमा सुदन किरातीको असन्तुष्टी- पार्टी संरचना संघीयस्वरूपमा जान सकेन

काठमाडौ । नेकपा माओवादी केन्द्रका केन्द्रीय सदस्य तथा सांसद सुदन किराँतीले पार्टीको संरचनामा संघीयस्वरूपमा जान नसकेको भन्दै असन्तुष्टी जनाएका छन् ।

जारी केन्द्रीय कमिटी बैठकमा समूहगत धारणा राख्नेक्रममा भोजपुर इन्चार्जसमेत रहेका किरातीले प्रदेश र स्थानीय तहलाई स्वायत्त अनि जिल्लालाई समन्वयको भूमिकाको व्यवस्था गर्नुपर्ने सुझाव दिएका छन् ।

८ पृष्ठको राजनीतिक प्रतिवेदनमाथि टिप्पणी गर्दै किरातीले भने, ‘मुलुक संघीय स्वरूपमा गइसकेको छ । तर, मुलुक हाँक्ने पार्टी केन्द्रिकृत मानसिकतामा चल्ने हो भने पार्टी बलियो हुँदैन ।’

स्थानीय तहलाई गौण बनाउँदै अझै जिल्ला नै निर्णायक हुने, प्रदेशभन्दा केन्द्रमा नै सर्वाधिकार रहने संगठनात्मक स्वरूपलाई परिवर्तन गर्नुपर्नेमा उनको जोड थियो । बलियो संगठनले मात्र आन्दोलन हाक्न सकिने भन्दै उनले भने, ‘संगठन बलियो बनाउन प्रणाली बनाउन आवश्यक छ । जनताको पक्षमा संगठनलाई परिचालन गरौं । आन्दोलन जनजीविकासँग जोडौं ।’

संविधानमा उल्लेखित शिक्षा, स्वास्थ्यजस्ता मौलिक अधिकारको जनताले प्रत्याभूत गर्न नसकेको भन्दै पार्टीले यसप्रति घनिभूत पहल गर्नुपर्ने किरातीले बताएका छन् । जनयुद्धका जनमुक्ति सेना, सांस्कृतिक मोर्चाहरूमा उभिएकाहरूको अवस्था अहिले दयनीय रहेकोतर्फ पार्टीको ध्यानाकर्षण गराउँदै गराए ।

‘आज जनमुक्ति सेनाका बहादुर कम्पनी कमाण्डरहरू सामान्य प्राइभेट कम्पनीमा सेक्युरिटी गार्ड गर्दैछन् । सामना सांस्कृतिक परिवारका कलाकारहरू दोहोरी गाउँन बाध्य छन् । घाइतेहरू उपचारको लागि चन्दा मागिरहेका छन्’, किरातीले भने’ ‘यसले बाहिर राम्रो मनोविज्ञान निर्माण भएको छैन । यसलाई पार्टीले सम्बोधन गर्नुपर्छ।’

उनले असमान सन्धि तथा भुपु ब्रिटीश गोर्खा सेनाको समस्यालाई समेत प्रतिवेदनमा उल्लेख गर्नुपर्नेमा उनले जोड दिएका छन् ।