पार्टी निर्णयविपरीत किन बैठकमा छिरे एमाले सांसद शाही ?
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/08/bijaya-shai.jpg)
रूपन्देही । नेकपा एमाले लुम्बिनी प्रदेश संसदीय दलको निर्णयविपरीत एक सांसद संसद् बैठकमा सहभागी भएका छन् ।
संविधानविपरीत आएको अविश्वास प्रस्तावलाई प्रदेश प्रमुखले मान्यता दिएको भन्दै एमालेले विशेष अधिवेशन बहिष्कार गरेको थियो । सांसद अजय शाही भने बैठकमा सहभागी भएका छन् । सदनमा सत्तापक्षको कुर्सीमा उनीमात्रै थिए । उनले नवलपरासीपश्चिम १ ख बाट सूर्य चिन्हबाट चुनाव जितेका थिए ।
शाही चार दलीय गठबन्धनको पक्षमा आएको र उनलाई गठबन्धनले स्थान दिने कांग्रेस दलका नेता वीरेन्द्र कानोडियाले नेपाल प्रेसलाई बताए ।
यसअघि बजेट निर्णयार्थ पेस गर्ने दिनमा पनि उनी बिरामी परेको भन्दै काठमाडौं गएका थिए । तर, एमाले सचेतक भूमिश्वर ढकालले शुरूमा शाही गए पनि पछि बाहिर आएको बताए । ‘मैले नि सुनेँ, उहाँ गएर एकछिन बसेर आउनु भएछ, मैले भेटेको छैन, केहो वास्तविकता बुझ्नेछु’, ढकालले नेपाल प्रेससँग भने ।