नर्विचले लोनमा भित्र्यायो चेल्सीका गिल्मोर

काठमाडौं । नर्विच सिटीले चेल्सीका युवा मिडफिल्डर बिली गिल्मोरलाई आगामी सिजन भरका लागि लोनमा अनुबन्ध गरेको छ । स्कटल्यान्डको प्रतिनिधित्व गर्दै अहिले जारी युरो २०२० मा उत्कृष्ट प्रदर्शन गरेका गिल्मोरले गत सिजन चेल्सीबाट सबै प्रतियोगितामा गरी ११ खेल खेलेका थिए ।

सन् २०१७ मा रेन्गर्सबाट चेल्सीको युवा टोलीसँग जोडिएका गिल्मोरले लन्डन साइडबाट २०१७-१८ मा यु १८ प्रिमियर लिग तथा एफए कप पनि जितेका थिए । गिल्मोर २०१९-२० सिजनमा पनि उत्कृष्ट प्रदर्शन गर्दै चेल्सीको एकेडेमी वर्ष खेलाडी घोषित भएका थिए ।

‘ म नर्विचसँग जोडिन पाउँदा एकदमै खुशी छु,’ गिल्मोरले भने , ‘म नयाँ सिजनलाई लिएर एकदमै उत्साहित छु । म सम्भव भएसम्म धेरै खेल खेल्दै नर्विचलाई प्रिमियर लिगमा फाइट गर्नका लागि सहयोग गर्नेछु ।’

नर्विच गत सिजन प्रिमियर लिगबाट घटुवा भएर फेरि यो सिजन प्रिमियर लिगमा बढुवा भइसकेको छ ।