काठमाडौंमा रिलिज भएको एक्सन-थ्रीलर ‘नोबडी’बारे तपाईलाई के थाहा छ ?

काठमाडौं । कोरोनाभाइरस महामारीको दोस्रो लहरको जोखिम सुरु भएसँगै फिल्म गतिविधि पनि प्रभावित हुन थालेको छ । यद्यपी, केही रोचक फिल्म भने रिलिज भैरहेका छन् ।

एप्पल एन्टरटेनमेन्टले युनिभर्सल पिक्चर्सको एक्सन-थ्रीलर फिल्म ‘नोबडी’लाई नेपाल रिलिज गरेको छ । बब ओडेनर्किक र केली म्याककर्मिक स्टारर फिल्म एक्सन फिल्म रुचाउने दर्शकलाई मनपर्न सक्छ । मार्च २६ मा यो फिल्म अमेरिकामा रिलिज भैसकेको छ ।

अपरिचितलाई समेत सहयोग गर्ने एक दयालु मान्छे कसरी अपराधीहरुको झुण्डसँग लड्छ भन्ने कथावस्तु यसमा छ । समीक्षकले यसले सकारात्मक प्रतिक्रिया प्राप्त गरेको छ । रटन टम्याटोजले ८१ प्रतिशत रेटिङ दिएको छ । समीक्षकले मुख्य पात्र ओडेनर्किकको अभिनयलाई रुचाएका छन् ।

मेटाक्रिटिकमा समीक्षक लेख्छन्- कुनै एउटा विधामा आधारित भएको यो फिल्मले ठूलै परिवर्तन त गरेको छैन तर, एउटा एक्सन फिल्मको रुपमा यसले नयाँ प्रयोगहरु भने अवश्य गरेको छ ।’ हलिउड रिपोर्टरमा जोन डिफोरले आनन्द लिनसकिने हिंसात्मक फिल्म भनेर यसलाई व्याख्या गरेका छन् ।

सिकागो सन्टाइम्सले चारमा तीन रेटिङ दिँदै फिल्मको प्रशंसा गरेको छ । एप्पल इन्टरटेनमेन्टकी जेनिस पहारीले फिल्मलाई हेरेका जति दर्शकले रुचाएको बताएकी छिन् ।