एग्युरोले १४ महिनापछि गोल गरेको खेलमा म्यानचेस्टर सिटी विजयी – Nepal Press

एग्युरोले १४ महिनापछि गोल गरेको खेलमा म्यानचेस्टर सिटी विजयी

एजेन्सी । अर्जेन्टिनी स्टार सर्जियो एग्युरोले १४ महिनापछि पहिलो लिग गोल गर्दा इंग्लिस प्रिमियर लिग लिडर म्यानचेस्टर सिटीले रेलिगेसन जोनमा संघर्षरत फुलह्याममाथि ३–० को जित हासिल गरेको छ ।

यो जितसँगै सिटीले शीर्ष स्थानमा १७ अंकको स्पष्ट अग्रता बनाएको छ । दोस्रो स्थानको म्यानचेस्टर युनाइटेडले २ खेल कम खेलेको छ । सन् २०२० को जनवरीमा शेफिल्ड युनाइटेडबिरुद्ध गोल गरेयता एग्युरोले प्रिमियर लिगमा गोल गर्न नसकेको ४ सय १७ दिन भएको थियो ।

फुलह्यामले घरेलु मैदानमा पहिलो हाफ गोलरहित रोके पनि दोस्रो हाफको सुरुआती १५ मिनेटभित्र तीन गोल खान पुग्यो । ४७ औं मिनेटमा जोआओ क्यान्सेलोको फ्रिकिकमा जोन स्टोनेसले ट्यापिङ गोल गरे ।

५६ औं मिनेटमा फुलह्याम गोलरक्षक अल्फोन्स अरेओलाको गल्तीको फाइदा लिँदै गाव्रियल जेससले गोल गरे । ६० औं मिनेमा फुलह्यामका टोसिन अडारावियोले फरान टोरेसलाई फल गरेपछि पाएको पेनाल्टीमा एग्युरो सफल भएका थिए ।

सिटीको ३० खेलबाट ७१ अंक भएको छ । २ खेल कम खेलेको युनाइटेडको ५४ अंक छ ।

प्रतिक्रिया

Leave a Reply

Your email address will not be published. Required fields are marked *