विराटनगर गुद्री बजारमा नगदरहित कारोबार शुरु, ‘क्युआर कोड’बाट भुक्तानी गर्दै गभर्नरले किने तरकारी

काठमाडौं । विराटनगरस्थित नयाँ गुद्री बजारमा आजदेखि एनएमबि बैंकबाट विद्युतीय कारोबार (क्युआर कोड) शुरु गरिएको छ ।

नेपाल राष्ट्र बैंकका गभर्नर महाप्रसाद अधिकारीले हरियो तरकारी खरीद गरी नगदरहित कारोबारको शुरुआतले  रकमको सुरक्षासहित सजिलो हुनुका साथै पारदर्शी हुने बताए ।

उनले विद्युतीय कारोबारले आधुनिक बजार विस्तारमा सहयोग पुग्नुका साथै यसबाट मुलुकमा सुशासन कायम गरी रकमको सुरक्षासमेत हुने बताए।

एनएमबि बैंकका प्रमुख कार्यकारी अधिकृत सुनिल केसीले मुलुकलाई समृद्ध कायम गर्न नेपाल सरकारको नीतिअनुसार महिला उद्यमीलाई बैंकका १८० शाखामार्फत विना धितो चार प्रतिशत व्याजदरमा ऋण प्रदान गरिरहेको जानकारी दिए ।

गुद्री बजार व्यवस्थापन समितिका अध्यक्ष पशुपति भगतले विद्युतीय कारोबारले यस क्षेत्रका व्यापार व्यवसायमा सहजता प्रदान गर्ने विश्वास गरे ।

बजार व्यवस्थापन समितिका सचिव गुड्डु साहेव, वडा नं ११ का अध्यक्ष तीर्थेन्द्र न्यौपाने, बैंकका प्रदेश प्रमुख उत्सव घिमिरेलगायतले मुलुकको विकासमा निजी क्षेत्रको भूमिका महत्वपूर्ण हुने बताए ।

गभर्नर अधिकारीले एनएमबि बैंकले महिला उद्यमी सन्तोषी भगतलाई चार प्रतिशत ब्याजदरमा उपलब्ध गराएको १० लाख रुपैयाँ ऋणको कागजात प्रदान गरे ।

गभर्नर अधिकारीले एवि टेडर्सका प्रमुख पशुपति भगतलाई विद्युतीय कारोबार कार्ड पनि हस्तान्तरण गरे । नयाँ गुद्री बजारमा ४०० व्यवसायीलाई विद्युतीय कार्ड प्रदान गरिएको छ ।