‘एकल विन्दु सेवा केन्द्र’ ले गति लिन सकेन

काठमाडौं । लगानी वृद्धि गर्न ‘एकल विन्दु सेवा केन्द्र’ को स्थापना भएपनि यसले आफ्नो उदेश्य अनुरुप काम गर्न भने सकेको छैन ।

लगानी प्रवद्र्धन तथा कानूनी प्रक्रिया सहजीकरणका लागि ‘एकल विन्दु सेवा केन्द्र ’ को स्थपना २०७६ सालमा भएको हो ।

परियोजनाको अनुमति, समझदारीपत्र, लगानी अनुमति, वा सम्झौतालगायत काम गर्ने गरि परियोजनालाई सहयोग एवं सहजीकरणका लागि यस केन्द्रको स्थापना गरिएको थियो ।  विदेशी लगानीका सबै काम विभागबाटै मिलाउनका लागि केन्द्र सञ्चालनमा ल्याइएको  हो ।

उद्योग विभागका महानिर्देशक जीवलाल भुषालले आफू विभाग आएपछि केन्द्रलाई कसरी अगाडि बढाउन सकिन्छ भनेर अध्ययन गरिरहेको बताए ।

अहिले केन्द्रमा भएका समस्याको समाधानका लागि काम भइरहेको उनको भनाइ छ । ‘लगानी केन्द्रलाई चलायमान बनाउन यसको इकाइमा काम गर्ने कर्मचारी उद्योग विभागकै हुनुपर्ने व्यवस्था गरिनु पर्छ ।  यसका लागि विभिन्न मन्त्रालय र विभागका कर्मचारीलाई पनि अधिकार दिइनु पर्छ,’ उनले भने ।

अधिकार प्रत्यायोजनका लागि उद्योग मन्त्रीको संयोजकत्वमा सम्बन्धित सबै मन्त्रालयका सचिवसँग छलफल गरिएको भुषालले बताए ।

यस केन्द्रमा भन्सार तथा राजस्व, पूर्वाधार (ऊर्जा तथा सञ्चार समेत), जग्गा सहजीकरण, भीसा सहजीकरण, उद्योग दर्ता, वातावरण, विदेशी विनिमय सहजीकरण र प्रशासन तथा कानूनलगायत ८ वटा इकाइ सञ्चालनमा छन् ।

उद्योग विभागमा केन्द्र स्थापना भएपछि विभागले दुई जना महानिर्देशक पाइसकेको छ । केन्द्रको प्रमुख पनि उद्योग विभागको महानिर्देशक नै हुने व्यवस्था रहेको छ ।

कम्पनी रजिष्ट्रार कार्यालयले केन्द्रका विषयमा धेरै नबुझेका कारणले पनि समस्या भएको भुषालले बताए ।

अर्थले हाल केन्द्रबाट प्यान दर्ता गर्ने र एक्जिएम कोड दिने मात्रै अधिकार छ यसले पनि समस्या गरिरहेको भुषालको भनाइ छ ।