प्रचण्ड-माधव पक्षले माघ २८ को प्रदर्शनलाई हालसम्मकै विशाल बनाउने

काठमाडौं । प्रचण्ड-माधव नेपाल नेतृत्वको नेकपाले माघ २८ गते काठमाडौंमा आयोजना हुने जनप्रदर्शनलाई हालसम्मकै विशाल बनाउने दावी गरेको छ ।

पार्टी कार्यालय पेरिसडाँडामा बसेको केन्द्रीय संघर्ष समितिको बैठकमा अबको काठमाडौं केन्द्रित जनप्रदर्शनलाई इतिहासकै ठूलो बनाउनेबारे छलफल भएको हो ।

बैठकमा अध्यक्षद्वय पुष्पकमल दाहाल प्रचण्ड र माधवकुमार नेपालले प्रतिनिधिसभा विघटनविरुद्धको आन्दोलनले देशब्यापी जागरण पैदा गरेको बताएका थिए । केन्द्रीय संघर्ष समितिका सचिवालय सदस्य प्रकाश विकल्पले काठमाडौंमा कम्तीमा २ लाख मानिस उतार्ने गरी तयारी गर्ने निर्णय गरिएको जानकारी दिए ।

आन्दोलनलाई अझ प्रभावकारी बनाउन जनपरिचालन गर्नुको विकल्प नरहेको नेताहरुलाई उदृत गर्दै केन्द्रीय सदस्य विष्णु रिजालले बताए । संविधान भत्काएर केपी अ‍ोलीले चाल्ने कुनै पनि तानाशाही कदमको प्रतिवाद गर्न तयार रहनसमेत प्रचण्ड र माधव नेपालले कार्यकर्तालाई निर्देशन दिएका छन् ।

बैठकमा दुवै नेताले निर्वाचन आयोगको निर्णयबाट द्विविधा नरहेको भन्दै दुई तिहाई बहुमत आफूहरुसँग रहेकाले त्यही अनुसार निर्वाचन आयोगले पनि उल्लेख गरेको बताएका थिए ।