मुलुककै ठूलो मल्टिप्लेक्स चेन क्रिसमसदेखि खुल्ने, अर्को शुक्रबार ‘मुलान’ रिलिज हुँदै

मुलुककै सबैभन्दा ठूलो मल्टिप्लेक्स चेन क्यूएफएक्स सिनेमाज् क्रिसमसदेखि खुल्ने भएको छ । अफिसियल फेसबुक पृष्ठमार्फत जानकारी दिँदै उसले पुस १० गतेदेखि हल पुनःखोल्ने उल्लेख गरेको हो ।

नौ महिनापछि हल खोल्न थालेको जानकारी क्यूएफएक्सले दिएको हो । प्रमुख नकिम उद्दिनका अनुसार हलिउड फिल्म ‘मुलान’ ओपनिङसँगै रिलिज हुनेछ । ‘मुलान रिलिजको तयारीमा छ’ प्रमुख नकिम उद्दिनले भने, ‘अरु फिल्म छलफल हुँदैछ ।’

‘मुलान’ लकडाउनपछि रिलिज हुने पहिलो फिल्म हुनेछ । गत चैत ११ गते सरकारले बन्दाबन्दी घोषणा गरे लगत्तै उक्त डिज्ने फिल्मको प्रदर्शन अन्तिम समयमा रोकिएको थियो । चलचित्र संघले भने, घरेलु फिल्म रिलिजको टुंगो अझै लगाएको छैन ।

रोकिएको फिल्म निर्माणको गतिविधि पनि सुचारु भएको छ । अध्यक्ष उद्दिन लकडाउनपछि रोकिएको हल निर्माण सुरु गर्न शुक्रबार वीरगञ्जतर्फ प्रस्थान गरेका छन् । क्यूएफएक्सले सुरुमा सिभिल, लाबिम, छायाँ मलमा रहेका हल चलाउने तयारी थालेको छ ।