चलचित्र ‘रङ्गेली’को गीत ‘फूल ओइलिएर’ सार्वजनिक (भिडिओ)

काठमाडौं । गत शुक्रबारदेखि प्रदर्शनरत नेपाली चलचित्र ‘रङ्गेली’को ‘फूल ओइलिएर’ बोलको गीत रिलिज भएको छ । युट्युबमा सार्वजनिक गीतमा सुशान्त गौतमको स्वर तथा सङ्गीत रहेको छ भने चलचित्रका निर्देशक अर्जुन सुवेदीले गीतको शब्द लेखेका छन् ।

शुक्रबारदेखि बिहीबारसम्म आइपुग्दा यो चलचित्रले उल्लेखनीय रूपमै शो र दर्शकहरु पाइरहेको छ । बुधवार दिउँसोका शोहरू सन्तोसजनक र साँझका शोहरू हाउसफुल थिए । दर्शकबाट चलचित्र केही लामो भएको प्रतिक्रिया पाएपछि २१ मिनेट घटाइएको थियो ।

अभिनेता दयाहाङ राईलाई एकै प्रकारका चरित्रमा देखिरहेको समयमा यो चलचित्रमा भने उनलाई केही फरक भूमिकामा प्रस्तुत गरिएको छ । चलचित्रको क्लाइमेक्समा अभिनेता आर्यन सिग्देलको ईन्ट्री पनि रोचक नै छ ।

नेपाल रिलिजपछि यो चलचित्र अमेरिका, क्यानडा, जापान, कोरिया, मलेशिया, दुबई, कतार, बहराइन, साउदी र ओमनमा रिलिज हुने पक्का भइसकेको छ । त्यस्तै, अस्ट्रेलिया, यूरोप, हङकङ, भारत लगायतका देशहरूमा पनि त्यहाँस्थित वितरकहरूसँग रिलिजको लागि कुरा अन्तिम चरणमा पुगेको बताइएको छ ।

‘रंगेली’मा मा दयाहाङ राई र मिरुना मगरको साथमा अर्पण थापा, प्रवीण खतिवडा, रमेश बुढाथोकी, रुपेश झा, सुन्दर धिताल लगायतको प्रमुख भूमिका रहेको छ । यस चलचित्रका गीतहरूमा हर्क साउद, अर्जुन सुवेदी र सबिन एकतारेको शब्द रचना तथा सुशान्त गौतम र हर्कुलस बस्नेतको सङ्गीत छ ।

चलचित्रका कार्यकारी निर्माताहरू जीतेन्द्र खतिवडा र अनुज जङ्ग थापा हुन् । निर्माताहरू संसार चौलागाईं र रमेश भट्टराई वशिष्ठ हुन् भने युवक कार्की र शिव शङ्कर चौलागाईँ सह–निर्माता हुन् । विवेक खड्का (योलो) एशोसियट निर्माता हुन् रहेको चलचित्रको छायाकार भने सुशन प्रजापति हुन् ।