‘अगस्त्य’को दर्शकलाई नयाँ सरप्राइज, निश्चल बस्नेतको ईन्ट्री

काठमाडौं। चलचित्र ‘अगस्त्य’ को टिमले दर्शकलाई नयाँ सरप्राइज दिएको छ । यो चलचित्रमा मुख्य कलाकारको रुपमा सौगात मल्ल, नाजिर हुसेन र मलिका महत रहेको भन्दै प्रचार गरिएको थियो । तर, चलचित्रमा निर्देशक तथा कलाकार निश्चल बस्नेतको पनि मुख्य भूमिका रहेको बताउँदै उनको लुक्स सार्वजनिक गरिएको छ । निश्चलको जन्मदिनको अवसर पारेर आज उनको पोष्टर सार्वजनिक गरिएको हो।

चलचित्र ‘दिमाग खराब’मा समेत आफ्नो सरप्राइज भूमिकाले निश्चलले दर्शकलाई मनोरञ्जन दिएका थिए । अब, फागुनको १८ गतेबाट रिलिजमा आउन लागेको चलचित्र ‘अगस्त्य’मा पनि उनको महत्वपूर्ण भूमिका रहेको खुलेको हो ।

सौरभ चौधरीको लेखन तथा निर्देशनमा तयार भएको यो चलचित्र भित्र अन्य थुप्रै सरप्राइजहरु रहेको निर्माणपक्षले बताएको छ । निर्माणपक्षले निश्चलको गेटअप सार्वजनिक गरेपछि दर्शकको उत्साह अझै बढ्ने निश्चित छ ।

चलचित्रमा निश्चललाई ‘अजित’ पात्रको भूमिकामा देख्न सकिन्छ भने चलचित्रमा प्रमोद अग्रहरी, विजय बराल, रवीन्द्र झाको पनि मुख्य भूमिका छ ।

डार्क हर्स इन्टरटेन्मेन्ट र सेभेन सिज इन्टरटेन्मेन्टको प्रस्तुतिमा तयार भएको चलचित्रमा प्रकाश मल्ल, अनिष तामाङ र विनोद पौडेलको लगानी छ । चलचित्रका कार्यकारी निर्माता विश्व गौचन र अभिषेक चौधरी हुन् ।