माओवादी मधेशका नेताको गुनासो- राष्ट्रियसभा खस आर्यको झुन्ड हुनेभयो

जनकपुरधाम । नेकपा माओवादी केन्द्रले राष्ट्रियसभा चुनावमा खस आर्यलाई मात्र समेटेको भन्दै मधेशका नेताहरूलेअसन्तुष्टि जनाएका छन् ।

माओवादी महोत्तरीका नेता रामकुमार शर्माले उम्मेदवार चयनमा विभेद भएको गुनासो गरेका हुन् । पूर्व सांसद उनले सामाजिक सञ्जालमा लेखेका छन्, ‘माओवादी तर्फबाट राष्ट्रियसभामा मधेश र मधेशी मुक्त ! लौ अवसर पाउने कमरेडहरूलाई हार्दिक बधाई ।’

यस्तै माओवादी सिरहाका नेता तथा पूर्व मधेश प्रदेशका सांसद जगत यादवले गठबन्धनले उम्मेदवार चयन गर्दा पहिचान सहितको (कलस्टर) लाई प्राथमिकता नदिएको टिप्पणी गरेका छन् ।

उनले सामाजिक सञ्जालमा लेखेका छन्, ‘अहिले हुने राष्ट्रियसभाको चुनावमा गठबन्धनको उम्मेदवार छनोट हुँदा पहिचानसहितको (कलस्टर)लाई प्राथमिकता नदिई खस आर्यलाई मात्र उम्मेदवार बनाइयो । राष्ट्रियसभा खस आर्यको झुन्ड हुने भयो ।’

राष्ट्रियसभामा गठबन्धनको बाँडफाँडमा ६ सिट पाएको माओवादीले मधेशीलाई समेटेका छैन । माओवादीले कोशीबाट चम्पादेवी कार्की, बागमतीबाट श्रीकृष्ण अधिकारी, गण्डकीबाट मनरूपा शर्मा, लुम्बिनीबाट झक्कु सुवेदी, कर्णालीबाट विष्णु विश्वकर्मा र सुदूरपश्चिमबाट रेणु चन्दलाई उम्मेदवार बनाउने निर्णय भएको छ ।