सुन तस्करीमा संलग्न भएको प्रमाणित भए महरा ‘बाबुछोरा’लाई कारबाही हुन्छ : जनार्दन शर्मा (भिडिओ)

हेटौंडा । नेकपा माओवादी केन्द्रका उपमहासचिव तथा पूर्व अर्थमन्त्री जनार्दन शर्माले सुन तस्करसँगको साँठकाँठमा माओवादी नेता कृष्णबादुर महरा मुछिएको प्रमाणीत भएका उनी पनि कारबाहीको भागेदार हुने बताएका छन् ।

प्रेस सेन्टर नेपाल, मकवानपुरले आज हेटौँडामा गरेको पत्रकार सम्मेलनमा बोल्दै पूर्व अर्थमन्त्री शर्माले गलत क्रियाकलापमा सहभागि भएका माओवादी नेताहरुलाई उन्मुक्ती नमिल्ने दाबी गरेका छन् । सरकारले अनियमिताको विषयमा गम्भिर भएर काम गरेको बताउँदै उनले अनियमिततामा संलग्न जोसुकै पनि कारबाहीको दायरामा आउने दाबी गरे ।

उनले भने, ‘सुन काण्डको विषयमा  सीबीआईले अनुसन्धान गरिरकेको छ, यदि नाम जोडिएका नेताहरुको प्रमाण प्राप्त भयो भने अवश्य पनि उहाँहरु कारबाहीको दायरमा आईहाल्नु हुन्छ, प्रमाण नपुगी सिधै कारबाही गर्नुपनि त भएन नि ?’

अब अन्य आयोग मात्रले काम गर्न नसक्ने भन्दै विषेश आयोग बनााएर सबै नेताहरुको छानविन हुन आवश्यक रहेको बताए । राज्यको रुपान्तरणको लागि सबैको छानबिन हुन अति आवश्यक भैसकेको भन्दै उनले सरकार यो काममा लाग्नेमा आफु विश्वस्त भएको बताए ।

सरकारले ललिता निवासदेखि सुनकाण्ड समेतको विषयमा गम्भिर भएर कामकारबाही अघि बढाएको बताउँदै उनले भ्रष्ट्राचारमुक्त मुलुक निर्माणको लागि माओवादी नेतृत्व तयार रहेको बताए । आफुले पटक–पटक पार्टी नेतृत्व र सदमा अनियमितताको विषयलाई कुनै पनि पार्टीको नाउँमा छाडन नमिल्ने सुझाव दिएको भन्दै उपमहासचिव शर्माले माओवादीको अध्यक्षले पनि कुनै गल्ती गरेको अवस्थामा कानूनको दायरामा आउने उल्लेख गरे ।

नेकपा माओवादीका नेताहरु सहर केन्द्रीत भए भन्ने जनगुनासो आएको स्किार गर्दै उनले माओवादीले अब जनताको घरघरमा गएर गुनासो सुन्नको लागि तीन महिने अभियान बनाएर पार्टी कार्यक्रमहरु सुरु गरेको बताए । पार्टी अध्यक्ष प्रचण्ड सहित सबै नेताहरु वडास्तरमा गएर काम गर्ने बताउँदै उनले अब जनताको साथमा माओवादीले गरेको काम र गर्नुपर्ने कुराहरुको बृहत अन्तरक्रिया गरिने उनले बताए ।