वाणिज्य बैंक र नलगाड नगरपालिकाबीच सहुलियतपूर्ण कर्जाका लागि सम्झौता

काठमाडौं । राष्ट्रिय वाणिज्य बैंक लिमिटेड र जाजरकोट जिल्लाको नलगाड नगरपालिकाबीच सम्झौता भएको छ ।

बिहीबार बैंक र नगरपालिकाबिच सहुलियतपूर्ण कर्जामा सहकार्य गर्ने सम्बन्धमा सम्झौतामा भएको हो । सम्झौतापत्रमा बैंकका प्रमुख कार्यकारी अधिकृत किरणकुमार श्रेष्ठ र नलगाड नगरपालिकाका नगर प्रमुख डम्बरबहादुर रावतले हस्ताक्षर गरेका हुन् ।

सम्झौता अनुसार नगरपालिकाले आफ्नो क्षेत्र भित्रका उद्यम तथा व्यवसाय गर्न चाहानेलाई परामर्श र उद्यमशीलता सम्बन्धी आवश्यक तालिमको व्यवस्थापन गर्ने गरी तालिम प्राप्त व्यक्तिलाई कर्जाको लागि बैंकमा सिफारिस गर्ने छ । सोही उद्यमीहरुलाई बैंकले नियमानुसार सहुलियपूर्ण कर्जा अन्तर्गत कर्जा लगानी गर्ने छ । सम्झौताले नेपाल सरकार अर्थ मन्त्रालयबाट जारी भएको सहुलियतपूर्ण कर्जाका लागि ब्याज अनुदान सम्बन्धी एकीकृत कार्यविधि, २०७५ (संशोधन समेत) अन्तर्गतको कर्जा कार्यान्वयनमा सहयोग पु¥याउने विश्वास बैंकको छ ।

कार्यक्रममा नगरपालिकाका नगर प्रमुख डम्बरबहादुर रावतले नगर क्षेत्र कृषिको पकेट क्षेत्र भएकाले कृषि उत्पादनमा सहयोग पुग्ने बताए । बैंकका नायब प्रमुख कार्यकारी अधिकृत देवेन्द्ररमण खनालले बैंकले राज्यले अबलम्बन गरेको सहुलियतपूर्ण कर्जा प्रवाहको पृष्ठभूमीको बारेमा बताउँदै उत्पादन, रोजगारी र आय श्रृजना गरी आर्थिक विकासमा योगदान पु¥याइरहेको बताए ।

बैंकको हाल देशभर २८२ वटा शाखा कार्यालय, ६५ एक्सटेन्सन काउन्टर, २६९ एटिएम र ९९शाखा रहित बैंकिङ्ग सेवा प्रदान गर्दै आइरहेको छ ।