छालारोग विशेषज्ञ डा. झा विश्व प्रसिद्ध जर्नल ‘आईडोज’ को पेपर रिभ्युअरमा छनोट

काठमाडौं । नेपालका प्रसिद्ध छाला, यौनरोग तथा कपाल प्रत्यारोपन विशेषज्ञ डा. प्रशन्नकुमार झा भारतको विश्व प्रसिद्ध इन्डियन डर्माटोलोजी अनलाइन जर्नल (आईडोज)को पेपर रिभ्युअरमा छनोट भएका छन् ।

एकेडेमिक स्तर राम्रो भएका डाक्टर झाका आर्टिकलहरु रिभ्युको लागि शैक्षिक उत्कृष्टता र विवेकको सम्मान गर्ने भन्दै रिभ्युअरहरुको टोलीमा सामेल हुन आमन्त्रित गरेको आईडोजले पठाएको पत्रमा उल्लेख छ ।

जर्नलका एडिटर इन चिफ प्रोफेसर डाक्टर केए सीतारामले पत्र लेख्दै उनलाई अनुरोध गरेका हुन् । नेपालबाट छनोट हुने डा. झा पहिलो डाक्टर हुन् ।

डा. झाले काठमाडौं मेडिकल कलेज (केएमसी)बाट एमबीबीएस, भारतको वनारस हिन्दू विश्वविद्यालय (बीएचयू) बाट क्लिनिकल डर्माटोलोजीमा तीन वर्षे एमडी र जर्मनीको ‘फेलोसिप इन एस्थेटिक मेडिसिन’ (फाम)को कोर्स पूरा गरेका छन् ।

उनका विश्वका विभिन्न प्रसिद्ध जर्नलमा १० वटाभन्दा बढी आर्टिकल प्रकाशित भैसकेका छन् । उनी इन्डियन सोसाइटी अफ एस्थेटिक मेडिसिन र इन्डियन इन्स्टिच्युट अफ लेजर एण्ड एस्थेटिक मेडिसिनका आजीवन सदस्यसमेत छन् ।

आफूलाई आईडोजले पेपर रिभ्युअरमा छनोट गरेपछि खुशी व्यक्त गर्दै डा. झाले यो नेपाल र नेपाली डाक्टरको लागि महत्वपूर्ण उपलब्धि रहेको बताए । यो छनोटले नेपाली डाक्टरहरु पनि हरेक कुरामा सक्षम र उत्कृष्ट छन् भन्ने सन्देश गएकाले नेपालीको प्रतिष्ठालाई माथि उठाउन टेवा पुग्ने उनको विश्वास छ ।