माओवादी घटकले भने- जनयुद्धलाई अपराधीकरण गर्ने दिवा सपना नदेख्नू 

काठमाडौं । नेकपा माओवादी केन्द्रका सचिव डिलाराम आचार्यले जनयुद्धलाई अपराधीकरण गर्नेहरूको मानसिकता अपराधीहरूको मात्रै भएको टिप्पणी गरेका छन्।

माओवादी घटकका दलको संयुक्त अन्तरक्रिया कार्यक्रमलाई सम्बोधन गर्दै उनले भने, ‘एक दिन सार्वजनिक बिदा दिँदा र राजपत्रमा उपलब्ध भएका नाम मात्रै प्रसारित गर्दा मान्छेहरूको नीद हराम भयो। सम्मान गर्ने कुरा टाढा छ। आफ्नो सर्वस्व खोसिएजस्तो गर्नु दुर्भाग्यपूर्ण छ। यस्तो मानसिकताले नेपाली समाजलाई आज नभए भोलि फेरि द्वन्द्वमा लैजान्छ।’

गणतन्त्र ल्याउनका लागि भएका घाउलाई कोट्याएर अपराधीकरण गर्न खोजेको टिप्पणी गरे।

उनले भने, ‘जनयुद्धलाई अपराधीकरण गर्न खोज्नु भनेको गणतन्त्र ठिक होइन भन्नु हो। देशमा माओवादीहरूलाई जेल हाल्ने दुईचार हजार बेपत्ता पार्ने, दश आठ हजारलाई जेल हाल्ने, त्यसपछि केही भाग्छन् केही आत्मसमर्पण गर्छन् र हामीले शासन गर्छौ भन्ने दिवा सपना मान्छेहरूले देखेका छन्। हामी देशका सबै माओवादीहरूको संयुक्त सभामा घोषणा गएका छौँ तिम्रो त्यो दिवा सपनालाई कुनै हालतमा पुरा गर्न सक्छौँ। त्यसमा दृढ संकल्प छौँ।’