एमाले नेता माओवादीको केन्द्रीय सदस्य मनोनीत

काठमाडौं । नेकपा एमालेका नेता यमबहादुर परियार (इन्द्रजीत) लाई नेकपा माओवादी केन्द्रले केन्द्रीय सदस्य बनाएको छ । चुनाव अगाडि अध्यक्ष केपी शर्मा ओलीको हातबाट टीका लगाएर एमाले प्रवेश गरेका परियार माओवादीले सार्वजनिक गरेको केन्द्रीय सदस्यको सूचीमा छन् ।

तत्कालीन माओवादीको चितवन जिल्ला सह-इन्चार्ज रहेका उनी साबिकको नेकपा हुँदा जिल्ला अध्यक्ष भएका थिए । एमाले माओवादीको एकतापछि माअ‍ोवादीको भागमा परेको चितवनमा उनी अध्यक्ष भएका थिए । एमालेका तत्कालीन जिल्ला अध्यक्ष कृष्णभक्त पोखरेल सचिव भएका थिए ।

पार्टीको एकता बदर भएपछि परियार माओवादीमा फर्किएका थिए । तर चुनावको मुखैमा पुनः उनी एमालेका गएका थिए । माओवादी अध्यक्ष पुष्पकमल दाहाल प्रचण्डको चुनाव क्षेत्र र पार्टीकै जिल्ला अध्यक्ष एमालेमा प्रवेश गरेपछि प्रचण्ड गोरखाबाट निर्वाचन लडेका थिए ।

माओवादी नेताहरूले भने प्राविधिक कारणले उनको नाम पर्न गर्न गएको बताएका छन् ।