चुनावलगत्तै माओवादी उपमहासचिव वर्षमान पुन: चीन जाँदै

काठमाडौं । रोल्पाबाट नवनिर्वाचित सांसद तथा नेकपा माओवादी केन्द्रका उपमहासचि वर्षमान यसै साता चीन जाने भएका छन् । नियमित स्वास्थ्य उपचारको सन्दर्भ मिलाएर वर्षमान पुन बेइजिङ जान लागेका हुन् ।

पुन निकट स्रोतका अनुसार काठमाडौंबाट नियमित उडान शुरु नभइसकेकाले हिमालयन एयरको कार्गो विमानबाट वर्षमान चीन जाने तयारी भइरहेको छ । सम्भवतः आइतवारसम्म उनी बेइजिङ जानेछन् ।

पुनको उपचार यसअघि पनि चीनमा भएको थियो । पार्टीभित्र चीनको विश्वासिलो पात्रका रुपमा स्थापित भएका पुनको चुनाव लगत्तै हुन लागेको चीन भ्रमणलाई राजनीतिक रुपमा पनि हेरिएको छ ।उनी नेकपा एमालेसँग सहकार्य गर्नुपर्ने पक्षमा छन् ।

चु्नावअघि पनि उनी कांग्रेससँग भन्दा एमालेसँग गठबन्धन गर्नुपर्ने पक्षमा थिए । चीनले नेपालमा कम्युनिष्टहरुको एकताका पक्षमा पहल गर्दै आएको छ ।तर यसपटक पुनको भ्रमण राजनीतिक उद्देश्यप्रेरित नरहेको उनको पारिवारिक स्रोतले जनाएको छ।