एकीकृत समाजवादीका युवाले सुरु गरे मेची महाकाली अभियान
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2022/08/Mechi-Mahakali-Abhiyan-Nekapa-Yes.jpg)
काठमाडौं । नेकपा एकीकृत समाजवादी निकट युवा संघ नेपालको चुनाव केन्द्रीत महाकाली मेची अभियान वुधबारबाट सुरु भएको छ ।
भदौ २४ गतेसम्म चल्ने अभियानको पार्टी कार्यालय तीनकुनेमा अध्यक्ष माधव नेपालले नेपालको झण्डा र पार्टीको झण्डा हस्तान्तरण गरेर शुभारम्भ गरेका हुन् ।
जनतामा सकारात्मक सन्देश प्रवाह गर्दै राजनीति प्रति उत्साह बढाउने, युवा पलायनलाई रोक्ने तथा भ्रष्टाचारविरुद्ध आवाज उठाउने र समाजवादी यात्रामा आम जनसमुदायलाई लामबद्ध हुन प्रेरित गर्ने सन्देश प्रवाहको लागि अभियान सुरु गरिएको समाजवादीले जनाएको छ ।
अभियानको उद्घाटन गर्दै पार्टी अध्यक्ष नेपालले स्थानीय तहमा दिएको मतका लागि जनतालाई धन्यवाद दिनुपर्ने र आगामी निर्वाचनमा पनि साथ दिन आग्रह गरे । उनले सिट बाँडफाँटमा तलमाथि भए मान्य नहुने स्पष्ट पारे । फाइदा हुने भएमात्रै गठबन्धन हुने भन्दै फाइदा नभए कसैको भर्याङमात्र नहुने उनको भनाई छ ।
भ्रष्टाचार र अनियमितताको आधार, भड्किलो र खर्चिलो उम्मेदवार बहिष्कार भन्ने नाराका साथ युवा संघले अभियान सञ्चालन गरेको हो । महाकालीबाट यात्रा सुरु गर्ने र मेचीमा पुगेर टुंगिने युवा संघले जनाएको छ ।