सामाजिक सुरक्षा कोषबाट विशेष सापटी दिन सुरु, एक सातामा लिए ८० जनाले दुई करोड

काठमाडौ । सामाजिक सुरक्षा कोषले ‘योगदानकर्ता सापटी सेवा’ दिन सुरु गरेको एक साताको अवधिमा नै ८० जना योगदानकर्ताले दुई करोड विशेष सापटी लिएका छन् । सामाजिक सुरक्षा कोषमा लगातार ३६ महिना अर्थात ३ वर्ष योगदान गरेका योगदानकर्तामध्ये ८० जनाले विशेष सापटी सुविधा लिएका कोषले जनाएको हो ।

भदौं एक गतेदेखि विशेष सापटी सेवा दिन थालेको कोषबाट योगदानकर्ताले कोषमा जम्मा बचतको ८० प्रतिशतसम्म विशेष सापटी लिन पाउने व्यवस्थाअनुसार लिएको कोषका कोषका सूचना अधिकारीसमेत रहेका डा.रोशन कोजूले नेपाल प्रेसलाई जानकारी दिए ।

निर्देशिकाअनुसार विशेष सापटी बाहेक योगदानकर्ताले ७० लाख सम्म धितोमा घर तथा आवास सापटी, शैक्षिक सापटी ३५ लाखसम्म र सामाजिक कार्यका लागि सामाजिक कार्य सापटी लिन सक्छन् ।

यद्यपी सामाजिक कार्य सापटी योजना भने अहिले कार्यान्वयनमा आइसकेको छैन । कोषमा नियमित ३६ महिना अर्थात ३ वर्षसम्म योगदान रकम जम्मा गरेका योगदानकर्ताले सामाजिक सुरक्षा कोषको मोबाइल एप ‘एसएसएफ नेपाल’ बाटै सापटीका लागि आवेदन दिन सक्नेछन् । गएको हप्ताबाट सामाजिक सुरक्षा कोषले मोबाइल एप्स सञ्चालनमा ल्याएको हो ।