एमालेको बहिष्कारपछि हेटौंडाको नगरसभा स्थगित
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2022/06/hetauda.jpg)
हेटौंडा । आफ्नो पार्टीले राखेको माग सम्बोधन नगरेको भन्दै नेकपा एमालेका जनप्रतिनिधिले हेटौंडा उपमहानगरपालिकाको नगरसभा बहिष्कार गरेका छन् ।
केही दिनअघि राखिएको बैठक सञ्चालनसम्बन्धी मागको बेवास्ता गर्दै पेलेर नीति तथा कार्यक्रम ल्याउन लागेको भन्दै आज बोलाइएको ११औँ नगरसभामा एमालेका जनप्रतिनिधि उपस्थित भएनन् ।
एमालेले बैठक सञ्चालन कार्यविधि-२०७४ को केही व्यवस्थामा संशोधन गरिनुपर्ने माग राखेको थियो ।
बिहान १० बजेबाट हुने भनिएको सभा दिउँसो २ बजे स्थगित भएको जानकारी गराइएको छ । मेयर मिना लामाले गणपुरक संख्या नपुगेको भन्दै आइतबारसम्मको लागि नगरसभा स्थगित गरेकी हुन् ।
९७ जना सदस्य रहेको हेटौंडाको नगरसभामा ४० जनाले मात्र हस्ताक्षर गरेको लामाले जानकारी दिइन् । एमालेसँगको वार्ता निचोडमा नपुगेपछि मेयर नगरसभा स्थगित गरिएको छ ।
एमाले जिल्ला सचिव तथा नगर दलका नेता नविन सिग्देलले मेयर लामाको हठका कारण नगरसभामा आफूहरू नगएको बताए ।