गृहनगर जनकपुरमा हुने पार्टीको सभामा निधि सहभागी नहुने

काठमाडौं । नेपाली कांग्रेसले जनकपुर उपमहानगरपालिकामा गर्ने चुनावी सभामा पूर्व उपभापति बिमलेन्द्र निधि सहभागी नहुने भएका छन् ।

पार्टीको निर्वाचन परिचालन समितिले बनाएको सूचीप्रति आपत्ति जनाउँदै गृहनगरमा हुने सो सभामा उनी सहभागी नहुने धनुषा कांग्रेसका उपसभापति गणेश झाले बताए । जनकपुरमा वैशाख २४ गतेका लागि सभाको मिति तोकिएको छ ।

जसमा निर्वाचन परिचालन समितिले बनाएको सूचीमा निधिको नाम उल्लेख छैन । जसमा प्रधानमन्त्री एवं पार्टी सभापति शेरबहादुर देउवा, वरिष्ठ नेता रामचन्द्र पौडेल, सहमहामन्त्रीद्वय भीष्मराज आङ्दम्बे र महेन्द्र यादवको नाममात्रै समावेश छ ।

यही कारण निधि सो सभामा सहभागि नहुने भएको धनुषा कांग्रेसका उपसभापति झाले बताए । ‘उक्त सभामा उहाँ उपस्थिति जनाउनुहुन्न । पार्टीका उम्मेदवारलाई जिताउन आयोजना हुने अरू कार्यक्रममा भने उहाँ भइराख्नुभएकै छ,’ उनले भने । अहिले निधि मधेसकै जिल्लाहरूमा चुनावी प्रचारप्रसारमा दौडधुप गरिरहेका छन् ।