एकीकृत समाजवादीका मेयर उम्मेदवारले गरे एमालेका उम्मेदवारलाई समर्थन

जनकपुरधाम । धनुषाको सबैला नगरपालिकामा नेकपा एकीकृत समाजवादीका मेयर उम्मेदवार राजु गुप्ताले नेकपा एमालेका उम्मेदवारलाई समर्थन गरेका छन् ।

सबैला नगरपालिकामा एमालेका तर्फबाट राज किशोर यादव उम्मेदवार छन् ।

आफ्नो पक्षमा माहोल नदेखेपछि एकीकृत समाजवादीका मेयर उम्मेदवार गुप्ताले एमाले उम्मेदवार यादवलाई समर्थन गरेका हुन् ।

एमाले उम्मेदवार यादवलाई समर्थन गर्ने वातावरण एमाले नेता एवं मधेस प्रदेशका पूर्व सांसद रामचन्द्र मण्डलले बनाएको बुझिएको छ । उनकै आग्रहमा गुप्ताले एमालेका यादवलाई समर्थन गरेका छन् ।

मण्डल ०७४ को निर्वाचनमा प्रदेश सांसदमा निर्वाचित थिए । संसदीय दलका नेता रहेका बेला उनी राज्यमन्त्री सरहको सुविधा पाउँदै आएका थिए । तर उनी माओवादी छाडेर एमालेमा प्रवेश गरेपछि उनको सांसद पद समेत गुमेको थियो ।

उम्मेदवार यादव नेकपा एमालेका जिल्ला अध्यक्ष समेत छन् ।

उनलाई मेयरमा समर्थन गरेका गुप्ताले आफ्नो पुरानो घर एमालेमा फर्केको प्रतिक्रिया दिएका छन् ।