गठबन्धनमा भागबण्डा: इटहरीमा नेकपा एसलाई उपमेयरसहित एक वडाध्यक्ष, माओवादीकाे भागमा दुई वडाध्यक्ष

इटहरी । इटहरीमा तीन दलीय गठबन्धनबीच शुक्रबार राति मात्रै भागबण्डा टुंगियो । भागबण्डामा यहाँ माओवादी केन्द्र र नेकपा एसले ‘बोनस’ पाएको छ । इटहरीमा नेकपा एसले उपमेयर र एक वडा अध्यक्ष परेको छ भने माओवादीले दुई वडा अध्यक्ष पाएको छ ।

यसअघि एकजना मात्रै जनप्रतिनिधि जितेको माओवादीले दुई वडा अध्यक्ष पाउनु नै ‘बोनस’ भएको नेताहरुले बताइरहेका छन् । माओवादीबाट चुनाव जितेका एक प्रतिनिधि पनि अहिले एमालेमा लागेका छन् ।

२० वडा रहेको इटहरीमा तीनबाहेक सबै वडा कांग्रेसले राखेको छ ।

सहमतिअनुसार माओवादीले १० र १८ को वडा अध्यक्ष पाएको छ भने वडा नम्बर १४ नेकपा एसको भागमा परेको माओवादीका इटहरी अध्यक्ष ज्वाला तामाङले बताए ।

वडा नम्बर १० मा झमक प्रसाद पराजुली र १८ मा राजदेश चौधरीलाई माओवादीले अध्यक्षको उम्मेदवार बनाएको छ । २० वडामा माओवादीले १८ वडा सदस्य पाएको छ ।

उपमेयरमा नेकपा एसले पूर्व राष्ट्रिय खेलकुद परिषदका सदस्य सचिव केशव बिस्ट र वडा नम्बर १४ को अध्यक्ष प्रेमचन्द रौतारलाई उठाएको छ ।