राखेपका सदस्य सचिव घिसिङ काममा फर्किए (भिडिओ)

काठमाडौं । राष्ट्रिय खेलकुद परिषद् (राखेप) का सदस्य सचिव टंकलाल घिसिङ काममा फर्किएका छन् ।

सर्वोच्च अदालतले मंगलबार तत्कालीन राखेपका सदस्यसचिव रमेशकुमार सिलवालले आफूलाई बर्खास्त गर्ने सरकारको निर्णयप्रति दायर गरेको रिट खारेज गरेपछि घिसिङलाई काम गर्न बाटो खुलेको थियो ।

कामकाज सम्हाल्दै घिसिङले चालु आर्थिक वर्षभित्र नै राष्ट्रिय खेलकुद आयोजनाको निम्ति प्रयास गर्ने बताए । राष्ट्रिय खेलकुदका लागि वैशाख ३० गतेसम्मको समयलाई दूरदर्शी योजना तयार गर्न उपयोग गर्ने उनको भनाइ थियो ।

घिसिङले अन्तर्राष्ट्रिय प्रतियोगितामा नेपालको सहभागिता बढाउन प्रशिक्षणमा जोड दिए । समग्र खेलकुदको विकासका लागि सातै प्रदेशसँग छलफल गर्ने पनि उनले प्रतिबद्धता जनाए ।

केपी ओली नेतृत्वको सरकारले नियुक्त गरेका सिलवाललाई वर्तमान देउवा सरकारले हटाएर टंकलाल घिसिङलाई सदस्यसचिव नियुक्त गरेको थियो । त्यसपछि सिलवाल अदालत पुगेका थिए ।

सर्वोच्चले यसअघि टंकलाल घिसिङलाई नियुक्त गर्ने र सिलवाललाई हटाउने दुवै निर्णय यथास्थितिमा राख्न आदेश गरेको थियो ।