कामु प्रधानन्यायाधीशविरुद्ध सर्वोच्चका कर्मचारीको मुख्य रजिष्ट्रारलाई साथ, न्यायाधीश नियुक्तिमा असहमत

काठमाडौं । कामु प्रधानन्यायाधीश दिपक कार्कीले सर्वोच्च अदालतका कर्मचारीहरुमाथि प्रतिशोधपूर्ण व्यवहार गरेपछि न्यायसेवाका कर्मचारीहरु असन्तुष्ट बनेका छन ।

प्रधानन्यायाधीश नहुँदै कामु रहेका कार्कीले नियुक्ति सरुवा र बढुवामा आक्रामक शैलीमा प्रतिशोधपूर्ण रुपमा व्यवहार देखाएपछि सर्वोच्च अदालतका कर्मचारीहरु असन्तुष्ट बनेका हुन ।

गत कार्तिक ८ गतेदेखि हड्तालमा उत्रिएका न्यायाधीश र त्यसको प्रतिवाद गरेका प्रधानन्यायाधीशकोबीचमा रहेका कर्मचारी तटस्थ बनेका थिए ।

तटस्थ बसेका कर्मचारीहरुमध्ये प्रशासनिक नेतृत्व सम्हालेका मुख्य रजिष्ट्रार लालबहादुर कुँवरलाई उच्च अदालतको न्यायाधीशमा नियुक्त गरेका छन् । न्याय सेवा अन्तर्गतबाट यसअघिका मुख्य रजिष्टार उच्च अदालतको मुख्य न्यायाधीशको रुपमा नियुक्त भईसकेका छन । तर कुँवरलाई हड्तालमा सहयोग नगरेको भन्दै कारबाहीको शैलीमा पन्छाउन खोजेका छन् ।

यद्यपी सर्वोच्च अदालत स्रोतका अनुसार मुख्य रजिष्ट्रार कुँवरले उच्च अदालतको न्यायाधीश अस्विकार गरेका छन । उनले आफ्नो इच्छा विपरितको नियुक्ति नखाने सहकर्मीहरुलाई बताएपछि यसबारे न्याय सेवाका कर्मचारीहरुले मुख्यरजिष्ट्रार कुँवरलाई साथ दिएका छन ।

कुँवरले कामु प्रधान न्यायाधीशलाई भेटेर यसबारेमा जानकारी समेत गराइसकेका छन् । उनी शुक्रबार पनि मुख्य रजिष्टारकै हैसियतमा हाजिर गरेका छन् । यस्तै न्याय सेवाभित्रका स्वच्छ छबि बनाएका रजिष्ट्रार नारायण प्रसाद पन्थीलाई राजीनामा दिन भनेको सर्वोच्च अदालत स्रोतले बताएको छ । तर उनले पनि राजीनामा नदिने बताएपछि उनलाई पन्छाउन ठाउँको खोजी भईरहेको बुझिएको छ ।

कर्मचारी क्षेत्रबाटै न्यायाधीश बनेर आएका कामु प्रधानन्यायाधीश दीपककुमार कार्की र वरिष्ठतम न्यायाधीश मीरा खड्काबाट अनपेक्षित रुपमा कर्मचारीमाथि प्रतिशोधपूर्ण व्यवहार देखाएपछि सर्वोच्च अदालतमा कार्यरत कर्मचारी संगठनहरुले समेत त्यसको चर्को विरोध गरेका छन ।

विभिन्न राजनीतिक दल सम्बद्ध कर्मचारी संघ संगठनहरु र उच्च तहका कर्मचारीहरुले अन्यायका बिरुद्धमा दह्रो खुट्टा टेक्न कुँवरलाई आग्रह गरेका छन ।