महेश बस्नेतको टिप्पणी- ओली शक्तिशाली सिंह, प्रचण्ड चारमुखे (भिडिओ)

काठमाडौं । नेकपा एमालेका नेता महेश बस्नेतले पार्टीका अध्यक्ष केपी शर्मा ओलीलाई सिंहको उपमा दिएका छन् ।

भक्तपुरमा आयोजित एक कार्यक्रमलाई सम्बोधन गर्दै नेता बस्नेतले ओली बालकोटमा भए पनि बालुवाटारमा भए पनि राजनीति उनकै वरिपरि घुमिरहेको आशय व्यक्त गरे ।

उनले भने, ‘वास्तममा केपी ओली बालुवाटारमा भए पनि बालकोटमा भएपनि केपी ओली, केपी ओली नै हुन् । केपी ओली सिंह हुन्, सिंह, सिंहदरबारमा जाँदैन । सिंह जहाँ बस्यो, सिंहदरबार त्यही आउँछ भन्ने कुरा आज पुष्टि भएको छ ।’

केपी ओली बालुवाटारमा वा बालकोट जहाँ भए पनि केन्द्रीय राजनीति ओलीकै वरिपरि रहेको उनको आशय थियो ।

नेता बस्नेतले हिजो ओलीलाई बार्दलीमा पुर्‍यायौँ भन्नेहरुलाई ६ महिनापछि आफूहरुले जवाफ दिएको बताए ।

उनले माओवादी केन्द्रका अध्यक्ष पुष्पकमल दाहाल प्रचण्डलाई चारमुखे भएको आरोप लगाए । एमसीसीका मामलामा प्रचण्डले गरेको अपरिपक्व कदमका कारण समस्या भएको उनको भनाइ छ ।