आजको संसदमा एमसीसी टेबल होला ?

काठमाडौं । आज प्रतिनिधिसभाको बैठक बस्दैछ । दिउँसो एक बजे बस्ने बैठकमा बहुचर्चित र विवादित अमेरिकी सहायता परियोजना (एमसीसी) टेबल हुन्छ कि हुँदैन भन्ने धेरैको चासो छ ।

हिजो बसेको सत्ताको नेतृत्व गरिरहेको दल नेपाली कांग्रेसले एमसीसी पारित गर्ने निर्णय गरेसँगै आजको संसदमा उक्त सम्झौता टेबल हुने धेरैको अनुमान छ । तर, संसद सचिवालयले हिजो जारी गरेको सम्भावित कार्यसूचीमा एमसीसीको विषय राखिएको छैन । हिजो प्रधानमन्त्री र कानूनमन्त्री लगायतले आज एमसीसी टेबुल गर्ने बताएका थिए ।

संसद बैठक बस्नुअघि कार्यव्यवस्था परामर्श समितिको बैठक बस्नेछ । र उक्त समितिको बैठकले संसदको कार्यसूची तय गर्नेछ । कार्यव्यवस्था समितिले संसदको कार्यसूचीमा एमसीसी पनि राख्ने सम्भावना छ ।

प्रमुख प्रतिपक्षी दल नेकपा एमालेले भने सदनमा अवरोध कायम राख्ने बताएको छ । आफूहरुले कारबाही गरेका सांसदलाई पदमुक्त गर्नुपर्ने लगायत माग राखेर एमालेले निरन्तर सदन अवरोध गरिरहेको छ ।